إزاي فريلانسر جديد قدر يكسب بروجيكت بقيمة 900$

بدون الحاجة لأي مقدمات لأن الموضوع دسم وطويل كفاية ووقتك مهم بالنسبالى، المقال دا هيكون فيه تجربة حقيقية من البداية للنهاية عن إن إزاي فريلانسر جديد New Seller قدر يكسب بروجيكت بقيمة 900$ وبعدها بروجيكتس تانية بقيمة 1460$ ودي كانت مجرد البداية بالنسباله.

قبل ما تكمل قراءة اسمحلي أنوه إن المقال دا هو بمثابة التجربة العملية للمقال السابق إزاي العميل بيفكر أثناء اختيار الفريلانسر وتكملة ليه عن إيه اللي بيحصل بعد ما العميل بيختار الفريلانسر، فا لو واجهتك أي صعوبة في فهم أي جزء من اللي جاي أنصحك تراجع المقال الأول في وقت تاني أو الوقتي أيهما أنسب بالنسبالك.

نبدأ بتفاصيل التجربة

نوع البروجيكت: تطوير مواقع Web Development.

الموقع المستخدم: Fiverr.

عدد الفريلانسرز اللي تم التواصل معاهم: 22 فريلانسر.

التكلفة النهائية للبروجيكت: 900$.

فترة الوصول الفريلانسر المناسب: 9 أيام.

البداية فعلياً كانت إن أحد عملائي محتاج يطور نظام خاص بالأفيلييت (التسويق بالعمولة) لمتجره الإلكتروني، وكان طلب مني أساعده في إننا نلاقي الحد المناسب للبروجيكت دا خصوصاً إن الفكرة معقدة، بدون الدخول في أي تفاصيل تقنية مملة دي الفكرة بإختصار.

أول مرحلة في البحث كانت بطرح البريف الخاص بالبروجيكت علي عدد من الشركات في مصر، الحقيقة جزء كبير منهم مقدرش يوصلي إحساس إنه فهم تماماً إحنا محتاجين إيه وكان التركيز كله منصب علي التكلفة، والجزء الآخر كانت تكلفة مبالغ فيها بعض الشيء (أقل تكلفة كانت 40 الف علي أقل تقدير وبإمكانيات أقل من اللي محتاجينها).

وكمان حاولت جداً أوصل لأي حد سواء علي بروفايلي أو ترشيحات من حد أعرفه وكلمت ناس كتير داخل مصر بس للأسف بدون نتيجة!

والسبب هنا في عرضه علي أشخصا أو شركات داخل مصر في البداية، هو إنه أولاً يفضل اللي هيشتغل علي البروجيكت يكون فاهم عربي لأنه جزء كبير منه هيكون عربي، ثانياً إنها حاجة بتحتاج دعم فني ممتد وتطوير مستمر فا يفضل إنه يكون شركة أو شخص داخل مصر لسهولة التواصل.

ماذا بعد الفشل في الوصول للشخص المناسب محلياً؟

بعد الفشل في الوصول للشخص المناسب للبروجيكت بشكل محلي اتجهت لمكاني المفضل في توظيف الفريلانسرز، واللي لو كنت متابع مقالاتي من فترة هتعرف بالتأكيد إنه Fiverr .

1. مرحلة البحث

في المرحلة الأولي بدأت أحاول أبحث علي شخص بينفذ النوع دا من البروجيكتس وعنده خبرة كافية في اللي محتاجينه، كانت أولويتي إني ألاقي حد مصري أو علي الأقل عربي عشان يتولى البروجيكت وبالفعل أرسلت البريف لعدد من الفريلانسرز المصريين الوحيدين اللي لقيتهم بيشتغلوا الحاجة دي وكانت النتيجة صادمة الحقيقة.

منهم اللي اعتذر عن عدم قدرته علي تنفيذ البروجيكت (احترمتهم)، ومنهم اللي قدم مواعيد للتواصل ومكنش موجود فيها ومنهم اللي رد عليا بعدها بأسبوع، ومنهم مردش عليا اصلاً!

2. مرحلة الـ Requests

بعد ما العميل مش بيقدر يوصل للفريلانسر المناسب علي حسب احتياجه واختياره الشخصي، غالباً بيلجأ لأنه يعمل Request (أو ما يعرف في بعض المنصات باسم Job).

وهو إنك تطرح البريف الخاص بالبروجيكت والفريلانسرز يشوفوه ويبدأوا يقدموا عروضهم عليه، الـ Request قدر يجذب اهتمام 11 فريلانسر، بس مين منهم اللي قدر يجذب انتباهي كان بالتحديد أتنين بس!

وللأسف هضطر أشرح النقطة دي مرة كمان هنا بمثال عملي لأنها مهمة فوق ما تتخيل، في معظم المقالات اللي اتكلمت فيها عن العميل، كنت دايماً بتكلم عن حاجتين مهمين، الاهتمام والثقة.

فا من فضلك اقرأ كويس جداً طلب العميل وأفهمه وأبدأ تواصل معاه بناء علي كلامه مش اللي أنت عايزه، ودا اللي حصل فعلياً كان 9 منهم رادين عليا بكلام كوبي وبيست أو بيتكلم عن خبرتهم ومهاراتهم (وقلت قبل كدا إن العميل مش مهتم بدا) واتنين بس اللي قدروا يجذبوا انتباهي لأنهم فعلاً قرأوا البريف وردوا عليا بناء عليه، توفيراً لوقتك مفيش داعي لعرض كل الأمثلة الغلط (لأنها موجودة في المقال السابق) وهكتفي بعرض الأتنين دول بس.

دول مثالين علي Proposals ناجحة وقدرت فعلاً تخليني مهتم أكتر بالتواصل مع أصحابها وتقدر تعرف الوصفة السحرية في الوصول لكدا من المقال دا، ودا بيقودنا للمرحلة النهائية.

 3. مرحلة التصفيات

في الوقت دا كنت متأكد إن واحد من الأتنين دول هو اللي هيكون الأنسب للبروجيكت دا، ومن هنا بدأت التواصل معاهم بشكل متوازي لضيق الوقت وسهولة المقارنة والاختيار.

أول حد كانت Julia واللي المناقشة معاها كانت سلسة ودسمة، بعد طرحها لكتير من الأسئلة أستمرت لـ 3 أيام عشان تتأكد تماماً من قدرتها علي فهم وتنفيذ البروجيكت (نقطة مهمة جداً) جوليا أكدتلي علي قدرتها في تنفيذ البروجيكت دا، ولزيادة التأكيد كنت طلبت منها تعمل Prototype لمسار الفكرة ككل، وفعلاً دا اللي عملته وهتشوفه في الصورة دي.

بسسست، لو عايز تعرف أكتر عن إيه هو الـ Prototype؟ وكيفية عمله؟ وليه هو مهم؟ ممكن تشوف تفاصيل أكتر في البوست دا.

ودا كان أقرب حاجة ممكنة للي محتاجين ننفذه، أثناء التواصل مع جوليا، كان في جانب آخر بيتم التواصل مع الفريلانسر التاني واللي الحقيقة كان التواصل معاه مبهر! فاكر مقال إزاي تقّفل ديل مع أي عميل من أول مكالمة؟ لو مكنتش قرأته فا أنصحك تقرأه ولو كنت قرأته فا أول حاجة رد عليا بيها الفريلانسر دا كانت بالظبط زي ما شرحت في المقال، كل اللي عمله إنه أولاً أظهر الاهتمام ورده كان عبارة عن إنه حول البريف وفكرة البروجيكت لنقط قابلة للتنفيذ، بس كدا مش أكتر ولا اقل!

دا كان أول حاجة رد بيها عليا ومن اللحظة دي انا عرفت تماماً إنه هو اللي هيكسب البروجيكت، علي الرغم من إنه كان لسا جديد وعنده بس تقييمين و Julia كان عندها قرابة 152 تقييم!

حتي بعد ردي علي كلامه وتوضيح الفكرة بشكل أبسط كان رده كالآتي:

لاحظ إنه للمرة التانية بدأ رده بـ

Let me understand

ودا أكبر تعبير ممكن عن إظهار الاهتمام اللي اتكلمت عنه في المقال اللي فوق.

بالنسبة لـ Julia في المرحلة دي الوقت والتكلفة اللي عرضتهم في التنفيذ كانوا بعيدين إلي حد ما خصوصاً الوقت، فا كملت المناقشات مع الفريلانسر التاني وعلي الرغم إنه لسا New Seller ومشوفتش أي شغل بيدل علي إنه يقدر يعمل البروجيكت دا.

بس معاملته واهتمامه بالموضوع خلاني أثق فيه جداً، ودي حاجة نتعلم منها درس مهم هي إن العميل بياخد قرارا اختيار الفريلانسر بناء علي الثقة أكتر من أي حاجة تانية حتي لو كان شغلك هو الأفضل بس مش واثق فيك بنسبة كبيرة هيفضل يتعامل مع حد يثق فيه عن حد بيقدم أعلي جودة ممكنة، ودي من أسرار إزاي تبقي فريلانسر ناجح حتي لو مستواك متوسط.

مرحلة ما بعد الوصول للفريلانسر المناسب.

الكلام اللي فات كان كله في مرحلة ما قبل اختيار الفريلانسر وإزاي تم اختياره والتواصل معاه للتأكد إنه الشخص المناسب للبروجيكت، المرحلة دي هي بداية الشغل فعلاً.

1. أهمية طلب الـ Documentation

بعد ما تم شرح كل التفاصيل المتعلقة بالبروجيكت، هنا بيجي الوقت إننا نتأكد إن كل النقط متفق عليها وإزاي هيتم التنفيذ والوقت وكل التفاصيل المتعلقة بالبروجيكت.

ليه مهم تطلب من الفريلانسر Documentation (توثيق) الأول؟

دي مش حاجة شائعة في كل المجالات ولكن هي ضرورية في المجالات التقنية زي التطوير، وخصوصاً للبروجيكتس الكبيرة اللي فترة العمل عليها بتكون أكتر من شهر وعلي أكتر من مرحلة.

والأهم هي إنه بدل من إنك تدفع قيمة البروجيكت بالكامل وبعدها تكتشف إن كان في أخطاء في التنفيذ أو الأفكار، انت بتعمله في صورة نقط قابلة للتنفيذ الأول وبتعدل عليها بكل حرية وبعدها بتحدد بشكل أفضل التنفيذ هيكون إزاي وفي وقت قد إيه وإيه التكلفة، بالتأكيد دا أفضل كتير!

بناء علي الكلام دا انا كنت طلبت منه Documentation كاملة فيها كل التفاصيل، وهو طلب يوم كمان عشان يجهز كل حاجة، تقدر تشوف الصورة عشان تفهم أكتر

طبعاً ذوقياً التوثيق دا يكون عليه مبلغ بسيط زي 10$ كنوع من أنواع إبداء الجدية (ودي طريقة ممتازة تختبر بيها عملائك) وكمان لأنها حاجة تستحق دا، وبالتأكيد أفضل من إنك تدفع قيمة البروجيكت بالكامل وأنت مش عارف إيه اللي هيحصل أو مفيش حاجة واضحة تقدروا ترجعولها تقيسوا عليها مدي تقدم الشغل.

بعدها بيومين فعلاً بعتلي واحد من أفضل الـ Documentations اللي شوفتها في حياتي تقريباً! 3 صفحات 21 نقطة وقرابة 1400 كلمة شرح فيها كل حاجة خاصة بالبروجيكت ابتداءاً من Our Requirements وصولاً لـ ?How we will accomplish this work بطريقة يصعب تصديقها.

الحقيقة إنه عمل حاجة عبقرية جداً وهي إنه مش بس أكتفي بأنه يقف عن الطلبات اللي إحنا طلبناها واللي معقدة كفاية ولكن كمان فكر في حلول ومميزات أقوي وأفضل وضافها وشرح إمكانية تنفيذ كل حاجة وطريقة عملها بشكل أفضل من اللي إحنا نفسنا فكرنا فيه!!

ودي حاجة نتعلم منها درس مهم جداً وهو إن طلبات العميل شيء وخبرتك وتفكيرك شيء تاني تماماً، دايماً ضيف للعميل القيمة اللي انت بتقدمها ومتكتفيش بكونك حد بياخد طلبات وينفذها.

2. مرحلة التفاوض!

بعد ما شوفت الـ Documentation انا بقيت واثق بنسبة 150% إن دا أنسب حد فعلاً للبروجيكت وكنت متحمس جداً نبدأ نشتغل عليه، بعد حبة مناقشات وصلنا لمرحلة السعر، وهنا حصلت حاجة غريبة وهي إنه طلب سعر مبالغ فيه حبتين وهو 3500$.

بالنسبالى كحد عارف تماماً مهارات تفاوض كنت عارف إن دا رقم إتقال لمجرد كسب نقطة اضافية في التفاوض مش أكتر، وبصراحة دا حمسني أكتر للموضوع لأني مش متعود أخسر في المرحلة دي بالتحديد ? بدون الدخول في أي تفاصيل كتير ومملة بعدها بأسبوع واحد تم الانتهاء علي 900$ (وكنت أقدر أوصل 800$ بس استحرمت).

مع العلم إن تكلفة البروجيكت المفروض تكون 1200$ ولو هو كان قال السعر دا من البداية كان بقي Done deal ولكن هو حول الموضوع لتحدي وانا بحب التحديات الحقيقة ?

وهنا كمان نتعلم درس مهم وهو إن الأسلوب دا في التفاوض والتفاوض عموماً مش مجدي، حدد قيمة خدمتك وقولها ومتسحمش بأي تفاوض في السعر، صدقني لو كان قال 1200$ كنت هوافق بدون أي نقاش، فا مفيش داعي تفتح باب للمفاوضات من الأساس لو كنت فريلانسر وقول سعر خدمتك فعلاً وخليك ثابت عليه.

  3. مرحلة الاتفاق والبدء في العمل.

بعد الوصول لسعر مناسب لينا إحنا الأتنين هنا بنبدأ في مرحلة جديدة وهي مرحلة البدء في التنفيذ، هل هتدفع 900$ مرة واحدة من قبل البدء في البروجيكت؟ بالتأكيد لأ!

هنا في نقطة مهمة لازم تاخد بالك منها وهي إنه في البروجيكتس الكبيرة اللي بتاخد وقت يفضل جداً إنه يتم تقسيمها علي مراحل أصغر بأجزاء من التكلفة، ودا موجود كميزة في موقع Freelancer.com باسم Milestones ودي أفضل حاجة أنصحك تعملها خصوصاً لو بتتعامل مع كلاينت/فريلانسر لأول مرة أو هو جديد أو مش واثق فيه مثلاً.

وفعلاً تم تقسيم البروجيكت بناء علي الآتي:

300$ مقدم > 200$ بعد 15 يوم > 100$ بعد كمان 15 يوم > 300$ بعد الانتهاء من البروجيكت.

في نقطة مهمة حصلت أثناء التفاوض لازم أذكرها

وهي إنه بناء علي طلب الفريلانسر اتكلمنا علي سكايب. نقطة مهمة جداً وهي إنك متعملش دا بأي شكل لأنه ممكن يعرض حسابك للقفل تماماً، أو لو هتعمله عشان مضطر ياريت تتأكد تماماً بإنه مفيش احتماليه وجود أي مشاكل بينكم لأنه في حالة تدخل الـ Customer support الخاص بالموقع ساعتها هيقروا الرسايل بينكم لتحديد المشكلة ولو لقوا أي رسالة منك بطلب التواصل خارج الموقع هيكون موقفك وحش جداً كفريلانسر وممكن حسابك يتقفل.

فا دي مخاطرة منصحكش باتخاذها، المهم إنه كمان أثناء التفاوض تم الاتفاق علي الدفع مباشرة عن طريق PayPal لأن 900$ بعد خصم عمولة الموقع و PayPal هيكون وصله مبلغ أقل بكتير، وطبعاً واقفت علي كدا لأن دا شغل ممتد علي كل حال والموقع هيكون عائق بالنسبالنا.

ولكن طبعاً دفع 300$ مباشرة علي PayPal تعتبر مخاطرة أكبر! لأن في الموقع انا كعميل هكون نوعاً ما مطمن لأن الفلوس بتكون في الموقع ولو حصل أي مشكلة بترجعلي لكن هنا مبقاش في الأوبشن دا، طيب إيه الحل؟

الحل كان بسيط جداً وهو إننا نبدأ أول تاسك علي الموقع بقيمة 100$ في البداية وبعدها كل الدفع هيكون عن طريق PayPal وفعلاً تم عمل أول أوردر بقيمة 100$ علي الموقع

وبعدها كان بيتم الدفع عن طريق PayPal حتي تم الانتهاء من البروجيكت بالكامل.

الجميل إنه نفذ البروجيكت بطريقة أكثر من رائعة وأفضل من شركات عرضت أكتر من 40 الف جنيه لمميزات أقل بكتير من الحالية ودا بيوضح القيمة اللي ضافها الفريلانسينج للعالم من حيث عدم الاكتفاء بس بالإمكانيات الموجودة محلياً ولكن تقدر تستعين بخبرات أكبر بكتير من أي مكان في العالم وكمان دا ممكن يكون بسعر أقل بمراحل.

النهاية السعيدة للمقال إن الفريلانسر دا أديته بروجيكت تاني قيمته 160$ وحالياً بيشتغل علي بروجيكت تالت قيمته 1400$ وإن شاء الله غيرهم أكتر مستقبلاً.

الدروس المستفادة من المقال في حالة لو كنت تهت في التفاصيل:

• العملاء بتدور علي فريلانسرز ممكن أكتر ما الفريلانسرز بيدوروا علي العملاء فا تسهيل الوصول ليك ممكن يكون مفيد أكتر من محاولة الوصول لعملاء أكتر. 
• اظهر الاهتمام تحصل علي الاهتمام، الموضوع بديهي وبسيط، قبل ما ترد علي عرض أي كلاينت إتأكد تماماً إنك فاهم طلبه كويس وأسأله أسئلة أكتر لأن دا هيظهر مدي اهتمامك وبالتالي هو هيهتم أكتر يسمعك، الكلام دا انا قولته بالتفصيل الممل في المقال دا فا أتمني تقرأه. 
• العميل بيتعامل مع الفريلانسر اللي يقدر يثق فيه مش مع الفريلانسر اللي بيقدم أفضل خدمة، ودي حاجة مهمة هتساعدك تكسب عملاء أكتر حتي لو مستواك متوسط فا بلاش تشوف مستواك علي إنه نقطة ضعف، وأفتكر إن اللي أخد التاسك دي أخدها بناء علي الاهتمام والثقة انا مكنتش شوفت شغله أصلاً! 
• التفاوض في أغلب الأحيان مش هيكون في مصلحتك، ياريت تحدد قيمة الخدمة اللي بتقدمها بدقة وتقف عندها تماماً. 
• قبل البدء في أي بروجيكت كبير يفضل تعمل Documentation الأول فيه كل تفاصيل البروجيكت وكيفية تنفيذه والوقت والتكلفة وكل التفاصيل الممكنة. 
• طلبات العميل شيء وخبرتك وتفكيرك شيء تاني تماماً، دايماً ضيف للعميل القيمة اللي انت بتقدمها ومتكتفيش بكونك حد بياخد طلبات وينفذها. 
• إياك تعرض أي طلب للتواصل خارج الموقع اللي بتتعامل عليه لأن دا فيه خطورة كبيرة عليك، ولو هتعمله يبقي مش لمصلحتك إن العميل يشتكي لخدمة عملاء الموقع في أي وقت لأنك هتتعاقب علي طلب التواصل خارج الموقع لو شافوا المحادثات ما بينكم. 
• في حالة لو كنت هتشتغل علي بروجيكت كبير يفضل تقسمه لمراحل أصغر علي عن الدفع يكون عند الانتهاء من كل مرحلة ما في البروجيكت، دا أفضل ليك وللعميل. 
• عملية البحث عن أنسب فريلانسر أحياناً ممكن تكون مرهقة، ودا معناه إن غالباً الكلاينت لما بيلاقي فريلانسر يقدر يثق فيه مش هيحتاج يدور في كل مرة يحتاج حاجة مشابهة وهيكلمه هو بشكل مباشر، فا إنك تكسب ثقة العميل أول مرة دا غالباً هيحوله لـ Return Customer بعدها جداً ودا قد يكون أفضل من محاولة الوصول لعملاء جدد.

في النهاية كنت حابب أشكرك علي وقتك وأتمني تكون التجربة ملهمة ومفيدة ليك لو كنت فريلانسر خصوصاً لو كنت لسا بتبدأ، وبتمنالك كل النجاح والتوفيق

مشاركتك للمقال دا ممكن تكون سبب في إفادة فريلانسر أو شخص بيحاول يكون فريلانسر، وإنك تكون سبب في كدا دي حاجة جميلة.

لو كنت فريلانسر، ياتري أول بروجيكت اشتغلت عليه كانت قيمته كام؟ ولو مكنتش فريلانسر لإيه اللي معطلك عن إنك تبدأ؟