الشغل الأول ولا الـ Portfolio؟

تعمدت إني أأخر المقال دا شوية علشان يكون فيه أكبر قدر ممكن من المعلومات والتفاصيل اللي هتساعدك تعدي خطوة الكل بيعتبرها معضلة وكتير بيقفوا عندها ومش بيقدروا يكملوا، هي الحقيقة أشبه بمعضلة “البيضة الأول ولا الفرخة”!

وانت لسا في مرحلة التعلم أو لو خلاص شايف نفسك مؤهل للشغل طبيعي هتلاقي نفسك في مرحلة أصعب منها وهي إزاي تقدر تثبت لغيرك قيمتك الحقيقة وإزاي تقدر تخلي حد يثق في إمكانياتك مهما كانت محدودة ويقرر يشتغل معاك.

وعلشان توصل للشغل فا انت محتاج يكون عندك Portfolio (سابقة أعمال) وعلشان يكون عندك Portfolio لازم بطبيعة الحال تكون عملت شغل! طب إزاي تعدي المعضلة دي بقي؟ في المقال دا هحاول أقولك كل الأسرار اللي هتساعدك تعدي المرحلة دي بسهولة جداً أياً كان إيه وضعك الحالي.

قبل ما أبدأ أتكلم عن الموضوع كنت حابب أكرر معلومة قولتها قبل في مقال إزاي تتعلم ي حاجة في أقل من شهر كدا لأني برضه لسا بلاحظها بشكل كبير، على اللي شوفته الفترة الأخيرة لقيت انه لو في 100 واحد بيتعلموا مجال ما وقبل أي حاجة إتسألوا عايزين تعملوا إيه الوقتي؟ متأكد تماماً إن 90 منهم هيقولوا “عايزين نشتغل!” أرجوك، أرجوك، أرجوك لو انت لسا في مرحلة التعلم متفكرش إطلاقاً في الشغل لأنك بكدا هتخسر فوق ما تتخيل!

 لأن ببساطة وانت لسا بتتعلم بيكون عندك خبرة قليلة ومهارة مش كبيرة لو قررت تدور على شغل هيكون محدد تماماً بالأتنين دول وبالتالي قيمتك وسعرك هيتحددوا على أساسهم وفي مرحلة ما هتحس إن دا غير مرضي بالنسبالك وصعب تغيره أو حتى تغير صورتك دي في وجهة نظر الكلاينتس اللي هتتعامل معاهم أو رئيسك في الشغل مهما كنت بتحاول تطور من نفسك.

ودا هيقلل قيمتك انت كفريلانسر -أو حتى موظف- وكمان بنسبة كبيرة ضغط الشغل هيعوقك من إنك تطور نفسك وتتعلم أكتر فا هتفضل في المستوي دا ومش هتقدر تطور نفسك ولا حتى تحقق دخل أكبر.

على العكس تماماً كل ما بتتعلم أكتر وتكتسب خبرة أكتر ساعتها الكلاينتس هما اللي هايكونوا عايزينك تشتغل معاهم ودا هيساعدك تحط لنفسك السعر اللي انت شايفه مناسب وتقدر بسهولة تزوده مع كل تطور بيحصل على مستواك.

 الفريلانسينج أشبه بكورة القدم، القيمة السوقية للاعب كورة القدم بتتحدد بشكل رئيسي على أداءه والأهم تأثيره في الملعب، ودا بيحتاج تدريب وتطوير مستمر شبه طول الوقت، فالمعادة بسيطة تدريب وتطوير أكتر يعني أداء أفضل يعني قيمة سوقية أعلي والأندية هي اللي هتدور عليك مش العكس، أعتقد المثال دا أوضح حاجة ممكن توصل الفكرة.

 أنا بس بحاول أقولك اللي هيحصل لأنه هيحصل بطريقة من أتنين وانت أختار سواء حابب المكسب السريع واللي هيكون قليل جداً على المدي البعيد ولا حابب تصبر وتتعلم وتحقق مكسب أكبر بكتير مستقبلاً، وأظن هتلاقي في قصة فؤاد بدوي خير دليل على اللي بقوله، وبالمناسبة انا اتكلمت عن تأثير دا من زاوية واحدة لكن ممكن أكتب مقال كامل عن قد إيه دا هيضرك.

في البداية إيه هو الـ Portfolio وليه مهم بالنسبالك؟

مش عايز أكون مكرر أو أقول كلام نظري هتسمعه بيتقال في أي مكان بس ببساطة شديدة الـ Portfolio هو مش مجرد سابقة أعمالك زي ما بيتقال، بالنسبالى الـ Portfolioأبعد من كدا بكتير، لأنه بيمثل هويتك وإيه اللى تقدر تعمله وبأي جودة وكمان بيعكس جانب كبير من شخصيتك إياً كان تخصصك.

ولازم تتعامل معاه بحرص شديد لأنه بيمثل قيمتك انت الشخصية كفريلانسر أو أياً كان نوع شغلك، اما بالنسبة لليه هو مهم بالنسبالك؟ لو الأسباب اللي فوق مش كافية اسمحلى أضيفلك أنه من أهم العوامل اللي هتأثر على إنه يجيلك شغل جديد وكمان هيحدد نوع الكلاينتس اللي هتتعامل معاك لأنه بيوضح جودة شغلك واسلوبك الشخصي واللي هيدور عليه اللي فعلاً محتاجة

 يعني جودة الـ Portfolioبتاعك بتتحكم بصورة أو بأخرى في جودة الكلاينتس اللي هيطلبوا يتعاملوا معاك وضيف بقي لكل دا أنه هيساعدك تحدد سعرك وقيمتك السوقية كفريلانسر بشكل كبير، ممكن برضه أكمل كتابة المقال عن أهميته بس ومش هكفيها حقها برضه بس أفضل نرجع لموضوعنا؛

وانت في المرحلة دي هتكون في سيناريو من تلاتة:

1. 1. مكنش عندك أي خبرة في مجال ما ولسا بتتعلمه أو اتعملته بنسبة ما بس مسبقش واشتغلت فيه قبل كدا، يعني من الآخر معندكش Portfolio أصلاً.
2. 2. اشتغلت في مجال ما لفترة أو حتى لسا شغال بس مهتمتش تكون لنفسك Portfolio قوي أو شايف شغلك مش قوي كفاية.
3. 3. شغلك كله بدافع الشغف مش الربح (art for art’s sake) وعندك شغل كتير بس مش شايف انه مناسب لسوق العمل أو مش عارف تكون منه Portfolio أو حتى وعايز تحول شغفك دا لمصدر دخل (art for life’s sake).

بنسبة 95% انت في واحد من التلات سيناريوهات دول، بعد ما تحدد انت في أي سيناريو فيهم استعد بقي علشان تعرف إيه اللي المفروض تعمله علشان تكّون لنفسك Portfolio يجيب شغل فعلاً.

ملحوظة: تقدر تقرأ الجزء المهم بالنسبالك من غير الباقي بكل بساطة.

1- لو مكنش عندك خبرة في مجال او لسا بتتعلم ومعندكش Portfolio أصلاً.

دا تقريباً السيناريو اللي فيه الغالبية العظمي من اللي بيبدأوا حياتهم كفريلانسرز، علشان أوضح المفاهيم انا قولت في كلامي إنك متدورش على الشغل، لكن العكس تماماً دور على التدريب المستمر سواء بشكل شخصي أو حتى في شركة لو تقدر، طيب إزاي تتدرب بشكل شخصي وتكون Portfolio من غير أصلاً ما يكون عندك شغل؟

انت حالياً عايز تعمل لنفسك Portfolio بس معندكش شغل؟ الحل بسيط جداً!

أدخل على 99designs أو Upwork أو مواقع الفريلانسينج او المسابقات المختلفة وهتلاقي فيها كم رهيب من الـ briefs خد اللي يناسبك منها وأشتغل عليه بداعي التدريب واللي شغلك هيعجبك منه ضيفه للـ Portfolio بتاعك عادي جداً بس اكتب Unofficial مثلاً.

أو حتي أعمل شغل من خيالك الشخصي كنوع من التدريب، ودا برضه مش عيب ولا غلط لأنك حالياً الـ Portfolio بالنسبالك هو محاولة لإظهار قدراتك وإمكانياتك وقدرتك على تنفيذ شغل حقيقي في أياً كان تخصصك، وبالمناسبة شارك في المسابقات دي مش هتخسر حاجة برضه بالعكس ممكن تكسب في مرة متعرفش الخير فين.

تاني حاجة أنصحك تعملها خصوصاً في المرحلة دي دور على التاسك اللي هتضيفلك انت قيمة كفريلانسر مش اللي هتدخلك عائد أكبر لأن الـ Portfolio بيمثل قيمتك ويعتبر استثمار بيزيد كل ما بتضيفله شغل جودته أعلي.

يعني مش مشكلة جداً إنك تشتغل شغل بعائد بسيط أو حتى مجاني في مقابل إن دا هيساعدك تخلي الـ Portfolio بتاعك أقوي، صدقني دا أفضل كتير من إنك تعمل شغل ليه عائد مادي كبير بس مش هتقدر تضيفه للـ Portfolio بتاعك، وأنصحك ترجع تقرأ مقال مشوار الألف عميل بيبدأ بعميل هيشرحلك النقطة دي بشكل أفضل.

تالت حاجة بقي علشان تخلص مرحلة التعلم دي بسرعة المعادلة دي هتسهل عليك كتير

اتعلم 50% وأتدرب 50% ولو هتشتغل يبقي شغلك ميزيدش عن 20% وطبعاً النسب دي بتتأثر بمدي قابليتك للتعلم ومستواك الحالي دي مجرد البداية، لازم تطبق كل اللي بتتعلمه أول بأول وحول أي معرفة نظرية اكتسبتها لتدريب عملي وكمان حتى لو هتشتغل متخليش الشغل يوقفك عن التعلم والتدريب المستمر علشان متقفش في نفس النقطة فترة طويلة.

 ومتكونش خايف أو مش واثق في نفسك كفاية إنك تشارك اللي بتعمله مع غيرك وتآخد آرائهم وتسمع مقترحاتهم ونقدهم لأن دا بعيداً عن إنه هيساعدك تطور من مستواك بسرعة هو كمان هيفيدك في حاجتين تاني مهمين،

 أول حاجة: إنك هتقدر تعرف الناس بتفكر إزاي وعايزة إيه وبالتالي هتشوف شغلك كصانع ومتلقي في نفس الوقت ودي نقطة قوة هشرحها فيما بعد

 وتاني حاجة: إنك هتعّرف اللي حواليك بصورة مباشرة أو غير مباشرة إن دا اتجاهك الشخصي والحاجة اللي بتعملها وزي ما قولت قبل كدا في مرحلة البداية المعارف الشخصية والعلاقات بتلعب دور مهم جداً في حياتك العملية.

رابع حاجة وبكررها كمان مرة “دورلك على معلم”

وللأسف الثقافة دي مش منتشرة عندنا بشكل كبير، وهي إنك تشوف حد من المتخصصين في مجالك والأكثر منك خبرة وتطلب منهم المساعدة في شغلك والـ Portfolio الخاص بيك وتعرف مقترحاتهم وآرائهم وإيه المشاكل ونقاط الضعف اللي عندك وإيه اللي محتاج تطوره.

 أختار الحد دا بعناية ولازم تكون واثق في رأيه وخبرته ومصداقيته وأنه اكتر منك خبرة وأبعد رؤية، وتقبل النقد منه بصدر رحب لأنك لو واثق في مصداقيته هتكون عارف إنه بيقولك كدا علشان يساعدك ولمصلحتك، وآخر حاجة حاول تكون مختصر وتاخد أقل قدر ممكن من وقته علشان يقدر يفيدك ويفيد غيرك على قد ما يقدر، ممكن تحس أنها حاجة ملهاش علاقة بس هتديلك دفعة معنوية قوية وكمان هتساعدك تتفادي كتير من الأخطاء في شغلك وتطور نفسك بسرعة وبالتالي هتعدي المرحلة دي بشكل أسرع.

2- لو شغال بقالك فترة بس مكنتش مهتم إنك تكون لنفسك Portfolio يليق بيك.

لو انت في السيناريو دا فا انا كنت زيك في يوم من الأيام وكنت كمان بقول إني مش لاقي وقت أهتم بالـ Portfolioبتاعي لمجرد إني عندي شغل كتير أو مش محتاج شغل أكتر من الناحية المادية مثلا.

 بس على المدي البعيد شوية اكتشفت إن دا غلط، أعتقد إنك كمان عندك حاجات كتير عملتها بس لسبب أو آخر مش قادر تضيفها للـ Portfolio بتاعك، نصيحة شخصية وقف تماماً النوع دا من الشغل مهما كان العائد المادي ليه، زي ما سبق وقلت انا حاجة بعملها وهفضل طول حياتي أعملها، لما بيتعرض عليا أي تاسك بسأل نفسي سؤال واحد بس علشان أحدد هقبل التاسك دي أو لأ “هل التاسك دي لما أخلصها هقدر أضيفها للـPortfolio بتاعي وأبقي فخور بيها؟” لو الإجابة “آها” يبقي بقبل التاسك ولو الإجابة “لأ” يبقي برفضها أياً كان المقابل المادي ليها.

لأن ببساطة مش من المنطق إنك تعمل شغل العائد الوحيد منه هو المقابل المادي ولفترة قصيرة، لما تركز على الشغل اللي تقدر تضيفه للـ Portfolio بتاعك دا هيكون ليه أكتر من مجرد عائد مادي لأنه كدا العائد المادي منه بقي مستمر وعلى مدي أبعد لأنه هيساعدك تشتغل على تاسكات أكبر مستقبلاً أعتقد فهمت الفكرة ?

تاني نصيحة هي إنك تهتم بالـ Portfolio بتاعك وتحسنه باستمرار

 لما مستواك يتحسن وتكتسب كم أكبر من الخبرة والمعرفة هتشوف في شغلك القديم أخطاء مكنتش بتشوفها وقتها، صحح الأخطاء دي وطور من أسلوب عرض شغلك نفسه وتابع إيه الجديد وأستلهم أكتر لأن كل دا هيساعدك تعرف إيه اللي ينفع تعرضه في الـ Portfolioوإيه اللي هيقلل قيمته.

 على سبيل المثال لو شايف إن شغلك القديم وجوده في الـ Portfolioهيقلل من قيمته بكل بساطة أتخلص منه أو صححه، وضيف شغلك الجديد واللي شايف انه بأفضل جودة عندك وبيعبر عن مستواك الحالي واللي تقدر تعمله، هي حاجات بسيطة وبديهية نوعاً ما بس هتعمل فرق كبير.

3- شغلك كله بدافع الشغف وحب اللي بتعمله ومش عارف تكون منه Portfolio وعايز تحوله لمصدر دخل.

في حالات كتير بتكون بتعمل حاجة بأسلوبك الشخصي أو بتعبر عنك وشايف انها مش مطلوبة في سوق العمل، لكن لو دورت شوية هتلاقي اكتر من مجال قريب جداً ليك وتقدر توظف اللي انت بتعمله دا فيه وكمان تحافظ لنفسك على اسلوبك الشخصي، إزاي؟

هقولك أكتر من مثال علشان أوصلك الفكرة

لو انت مثلاً حد بتشتغل Photo manipulation وبتحب تدمج صور مع بعض وتوصل رسالة أو فكرة في النهاية وبتعمل دا للهدف دا بس. انت حواليك مجالات مهمة ممكن برضه توظف فيها اللي بتعمله وكمان تحقق عائد محترم زي المجالات دي Advertising & Movies Posters & album Covers & Social Media

دول أمثلة لـ 4 مجالات مطلوب فيهم شغل كير وبيدخل فيهم الـ Manipulationبشكل أساسي وتقدر تتخصص في واحد منهم بسهولة وتحقق منه عائد كويس كمان!

مثال كمان: لو انت مثلاً بترسم بأسلوب معين أياً كان فا انت حواليك فرص كتيرة لتحويل رسمك دا لشغل بمجرد إنك تتخصص في ستايل معين او حتى مجال معين زي مثلاً
Storyboard Art, Portrait, Digital Art, Concept Art وهكذا دول جزء بسيط من مجالات كتير ممكن تحول الـ Portfolio الشخصي بتاعك ليها بسهولة جداً وهتبقي بتعمل اللي بتحبه وكمان هتحوله لمصدر دخل.

علشان كدا نصيحتي ليك إنه مفيش حاجة في الحياة أفضل من إنك تحول الحاجة اللي بتحبها لمصدر دخلك لأنك هتعملها بحب وهتهم تطورها وتطور نفسك فيها أكتر ودا اللي هيساعدك تزود قيمتك فيها مع الوقت ❤

وعلشان تزود قيمتك فيها مع الوقت مهم جداً يكون ليك Portfolio, اللي عايز أقوله باختصار إنك حتى لو مش شايف إن شغلك مناسب لسوق العمل أو خلينا نقول مش مطلوب بشكل كبير برضه ضيف شغلك أول بأول.

 وأبدأ مع الوقت أدخل واحدة واحدة في مجال قريب من اللي انت بتعمله وابدأ طور نفسك فيه أكتر ومن وقت للتاني أعمل أجزاء منه للشغل وأجزاء لإنك تعرض شغلك بداعي الإلهام ودا هيضيف قيمة كبيرة للـ Portfolio بتاعك في الحالتين وهيساعدك توصل لعدد أكبر من المهتمين بأسلوبك الشخصي وممكن حتى يساعدك تحوله لمصدر دخل أساسي وعندنا أشهر مثال أحمد عماد الدين مثلاً في التصميم.

السؤال الأهم، إيه أنسب مكان تعمل لنفسك فيه Portfolio؟

في النقطة دي انا هتكلم عن التصميم بشكل كبير بحكم أنه مجالي، بالنسبة للتصميم بشكل عام في أماكن كتير بتديلك إمكانية إنك تعمل لنفسك Portfolio وتساعدك تنشره بين أكبر عدد من العملاء المهتمين أو حتى المصممين الآخرين، بس النقطة إن كل مكان فيه مجال معين بيميزه زي مثلاً:

• – لو كنت مصمم أو مصور أو UI/UX Designer أو بتصمم Typography أو Digital Artist أو تقريباً أياً كان مجالك التصميم فا أفضل مكان ليك Behance أو AdobeProtfolio
• – لو كنت متخصص في UI/UX أو Web Design أو Illustration أو Logo Design أنسب أماكن ليك  Dribbble  و Uplabs و Awwwards
• – لو كنت مهتم بالرسم والـ Digital Artاو الـ 3Dاو الـ Manipulationفا أفضل مكانين ليك هما Artstation و Deviantart

  وطبعاً كل مجال وليه مواقع متخصصة في كدا زي مثلاً Github بالنسبة للبرمجة وهكذا، مهم إنك تعرف إيه أفضل مكان تعمل فيه الـ Portfolioالخاص بيك وأكيد إنه يكون في أكتر من مكان دا برضه هيفيدك أكتر.

أفضل حاجة ممكن تعملها هي إن الـ Portfolio بتاعك يكون جزء من موقعك الشخصي بس دي خطوة متقدمة شوية فا ممكن تعملها مستقبلاً إن شاء الله.

آخر حاجة بقي هقولك 5 نصايح هتساعدك في إنك تحسن من الـ Portfolio الخاص بيك

• 1- حدد الهدف الأساسي من الـ Portfolioالخاص بيك، هل هو علشان تجذب عدد أكبر من العملاء او تظهر طريقة شغلك أو تساعد في الهام غيرك من اللي بيشتغلوا في نفس المجال؟ وحاول تخلي أهدافك متنوعة لأن دا هيكون أفضل اكيد بس ركز على هدف أساسي بشكل أكبر.
• 2- متهملش الدور الأساسي للمواقع اللي فوق وتتعامل معاها على إنها مكان بيتيحلك إمكانية عمل Portfolio وإضافة شغلك بشكل كويس، خليك دايماً فاكر دورها الأساسي في الاستلهام المستمر ودا هيخليك تحسن من شغلك بشكل عام.
• 3- تابع كل الجديد في مجال تخصصك سواء شغل غيرك أو كتب أو مقالات وأستغل دا في إنه يحسن شغلك وشكل طريقة عرضه في الـ. Portfolio
• 4- زي ما قولك الـ Portfolio الخاص بيك هو هويتك وبيعكس جزء كبير من شخصيتك علشان كدا مهم تطور لنفسك ستايل خاص لطريقة عرض شغلك فيه بحيث إنك متحتجش تكتب اسمك علشان الناس تعرف إن دا شغلك بس برضه أبعد عن إنك تكرر نفسك وكون دايماً متجدد وطور ستايلك بشكل دائم.
• 5- آخر نصيحة هي إنك تبعد عن التقليد والتكرار لأنك هتقلل من قيمة الـ Portfolio بتاعك وقيمتك انت كفريلانسر ودا ممكن يأثر عليك سلبياً بشكل كبير.

الحقيقة في كلام كتير لسا عاوز أقوله بس مش حابب إن المقال يكون طويل أكتر من اللازم (على أساس إنه كدا مش طويل) فا هكتفي بالنصايح دي واللي أتمنى تفديك في حياتك كفريلانسر وتساعدك تحسن مستواك ودخلك في نفس الوقت.

لو كان المقال دا مفيد بالنسبالك أتمنى تعمل شير لأنه أكيد هيكون مفيد بالنسبة لغيرك وممكن يفرق معاه جداً.

أنت حالياً في أي سيناريو من التلاتة؟ وإيه اللي محتاجه علشان تبدأ؟