مشوار الألف عميل بيبدأ بعميل

“إيه أنسب مواقع أشتغل عليها؟” “المواقع العربي أفضل ولا الأجنبية؟” “انا بشتغل كذا تنصحني أشتغل على أي موقع؟” الأسئلة دي بتمر عليا بشكل يومي والحقيقة بتخليني أفكر أكتر، مين قال إن الفريلانسينج بيقتصر بس على المواقع!

الأسئلة دي على الرغم من إنها تعتبر أهم الأسئلة لواحد بيبدأ حياته كفريلانسر إلا إني استغربت منها جداً! وخلتني أسأل نفسي “هو ليه كل الناس فكرتها عن الفريلانسينج أنك تشتغل بس على مواقع الفريلانسينج؟ ?” على المستوي الشخصي انا حالياً شغلي بقي بنسبة 95% شغل بعمله 101 لعملاء أو شركات وشبه مش بتعامل مع مواقع فريلانسينج إلا لأني أطلب فريلانسرز!

علشان كدا قبل ما أتكلم عن الأسئلة دي وأجاوبها، حسيت أنى من باب أولي أصلح الفكرة دي لأنك مش شرط تشتغل على أي موقع ما علشان تبقي فريلانسر، بالعكس انا شايف إن مشاكل التوظيف وسوق العمل في مصر تحديداً هي أكتر حاجة هتساعدك تشتغل فريلانسر جوا مصر أصلا.

لو مش واخد بالك، حالياً بقي في كم كبير من الشركات والـ Startups وأصحاب العمل اللي بتفضل تتعامل مع فريلانسرز عن أنهم يتعاملوا مع شركات فا فرصتك نوعا ما أفضل منهم في الوقت الحالي، علشان مضيعش وقت كتير في توضيح الفكرة هحاول أقدملك 5 نصايح عن إزاي تخلي الشغل هو اللي يجيلك مش انت اللي تدور عليه في موقع أو غيره:

1- الـ Portfolio (سابقة أعمالك)

أهم حاجة بالنسبالك كفريلانسر هي الـ Portfolio بتاعك، شغلك اللي عملته هو أهم حاجة بالنسبالك لأن دا يعتبر مثال على شغلك وإيه اللي تقدر تعمله والسبب الأساسي في معظم الأحيان إن الكلاينت يقدر يعرف انت بتقدم إيه وازاي ويطلبه منك على أساسه.

شخصياً انا لما بيطّلب منى أي تاسك بسأل نفسي سؤال واحد بس علشان أحدد هقبل التاسك دي أو لأ “هل التاسك دي لما أخلصها هقدر أضيفها للـ Portfolio بتاعي وأبقي فخور بيها؟” لو الإجابة “آها” يبقي بقبل التاسك ولو الإجابة “لأ” يبقي برفضها أياً كان المقابل المادي ليها.

لو حابب تعرف أكتر عن أهمية الـ Portfolio ممكن تقرأ الشغل الأول ولا الـ Portfolio، بس في الوقت الحالي عايزك تفكر فيه على إنه بيمثل قيمتك السوقية وكل ما خليته أقوي كل ما زود دخلك أكتر وزود قيمتك كفريلانسر وهيجيلك عن طريقه معظم الشغل بطرق مختلفة.

2. استثمر في نفسك

لما اتكلمت عن مميزات الفريلانسينج في الفرق بين الموظف والفريلانسر قلت

بيجبرك تطور من نفسك ومهاراتك بشكل يومي لأن زي ما قلنا المنافسة بقت على نطاق أوسع ولو مقدرتش تقدم خدمة أفضل وسعر أنسب هيكون في مليون بديل ليك فا بتكتسب قيم ومهارات زي التعامل مع العميل وبتحسن شغلك دايماً

كفريلانسر انت أهم من أي حاجة وكل حاجة, مينفعش يكون وقتك كله شغل لازم يكون في وقت مخصص حتى لو 15 دقيقة في يومك تستغلهم في إنك تطور من نفسك ومهاراتك ومهارات التواصل والبيع وأياً كان اللي شايف نفسك عندك مشكلة فيه ومحتاج تطوره.

لو انت designer أو developer مثلاً حاول على الأقل تتابع كورس جديد كل أسبوع, تقرا كتاب بيتكلم عن حاجة في مجالك, تقرا مقالات مهمة ليك (زي المقال دا مثلاً ?)

لو كنت مصمم أنصحك تشوف 15 كتاب لازم تقراهم لو كنت مصمم جرافيك

مش هقدر أقول حاجة محددة تعملها لأنك علشان تعرف انت محتاج تتطور في إيه لازم تعرف نفسك الأول وتحدد إيه اللي محتاج تطور نفسك فيه، بس المهم إنها تكون عادة يومية بالنسبالك وخليك فاهم كويس جداً إن كل دقيقة بتطور فيها نفسك بتكسب قصادها 10 دقايق من وقت شغلك ومتفكرش في الوقت دا على إنه وقت ضايع أو أن الشغل أهم أو حاجة.

مع مرور الوقت هتعرف جداً قيمة الوقت اللي كنت بتتعلم فيه حاجات جديدة وازاي هينعكس على شغلك ويحسنه بشكل خيالي!

3. طور علاقاتك

لو انت بتشتغل فريلانسر لوقت كبير، أنا متأكد إنك لو فكرت هتلاقي إن 80% من شغلك كان عن طريق حد تعرفه أو حد يعرفك ويعرف إنك بتعمل حاجة ما بشكل مميز.

علاقاتك الإجتماعية هي تاني حاجة تهتم بيها كفريلانسر وأول حاجة تهتم بيها كشخص قبل أي حاجة, كل ما كّونت علاقات إيجابية أكتر كل ما نسبة أنه يتم ترشيحك لتاسك بتكون أكبر, ومهم جداً إنك تكون علاقات إيجابية مع زمايلك في نفس المجال اللي بتشتغل فيه.

لو كنت مصمم مثلاً حاول تعرف كم أكبر من اللي بيشتغلوا في نفس مجالك وتدخل جروبات مصممين اكتر وتشارك في تجمعات, وتاخد فكرة أكبر عن مجالات مقاربة ليك لأن دا هيفيدك في حاجات كتير أهمها الاستلهام وأنه هيساعدك تطور من نفسك لما تشوف مستويات أفضل وإنك تساعد اللي محتاج مساعدة خصوصاً إن دي من أكتر الحاجات اللي هتساعدك تحسن فرصتك في إنك تشتغل أكتر.

4- اتعلم فن البيع

بالظبط زي ما قريت كدا اتعلم البيع! مشكلة ناس كتير انهم مش مدركين إن البيع مهارة -وانا بعتبره فن- مش بس بتقتصر على اللي بيشتغلوا في مجالات البيع المباشر زي المحلات مثلا، أبسلوتلي! البيع دا مهارة من رأيي لازم تتوافر عندك حتى لو كنت Chairman في أكبر Corporate.

انت كفريلانسر ببساطة بتبيع وقتك وخبرتك ومهارتك في عمل شيء ما لشخص ما أو شركة، في البداية لو مش بتعرف تسوق لنفسك صح مش هتعرف تبيع اللي انت بتعمله فا مهم جداً تتعلم إزاي تتعامل مع عميل وإزاي تقدمله عرض ميترفضش للخدمة اللي بتقدمها، وليه يشوفك انت أنسب حد هتعمله الشغل دا.

ليه بقولك إن دا مهم، لإن ببساطه ثقافة الفريلانسينج لسا موصلتش للكم الأكبر من الـ Business owners (أصحاب العمل) فا فكره إنه يثق فيك في البداية ممكن تبقي صعبة شوية علشان كدا لازم من أول مكالمة توصله النقط اللي هو بيدور عليها زي إنك شخص جاد وملتزم وملم بتفاصيل التاسك وهتقدر فعلاً تنفذ اللي هو بيدور عليه، لو شك لحظة إنك ناقصك واحدة من الصفات دي هيدور على غيرك بدون تفكير علشان كدا بقولك إن إحنا هنا مش في نقطة إن الانطباع الأول بيدوم، انت بنسبة كبيرة لو مسبتش انطباع أول مش هيكون في أي انطباعات تاني أصلا!

5. قدم قيمة مضافة

النقطة دي انا بعتبرها من أسرار نجاح علاقتي مع العملاء اللي بيتعاملوا معايا واللي أغلبهم أكتر من سنتين!

السرر ببساطه هو إنك دايماً تقدم للعميل قيمة مضافة، دايماً أديله أسباب أكتر علشان يتعامل معاك انت قبل أي حد تاني, دايماً أعمل أكتر من اللي العميل طالبه, زود Gifts في الخدمات اللي بتقدمها, أعرف أكتر عن المجالات اللي حواليك لأنه في عالم الديجيتال كل حاجة متقاربة جداً وبتقود لبعض بشكل سلس جداً, يعني مثلاً لو انت حد بتصمم شعارات فا من البديهي جداً أن العميل اللي هيطلب الخدمة دي هيدور على خدمة طباعة مثلاً او Web Development أو Social media marketing أو Photography.

فا بالتالي لازم تاخد فكرة أكبر عن المجالات اللي حواليك علشان تقدر تساعد العميل بتاعك أنه يوصل لأحسن حاجة هتفيده, تخيل مثلاً أنى بقالي 3 سنين بتعلم وبقرا كتب عن البيزنس لمجرد إني أقدر أقدم للعملاء نصايح عن إزاي يحسنوا من شغلهم ويحققوا دخل أكبر وإزاي يحلوا مشاكل بتواجههم فيما يتعلق بالبيزنس الخاص بيهم!

من رأيي إن تقديم قيمة مضافة على اللي انت بتعمله هو أهم الأسباب اللي هتساعدك تحافظ على علاقة أفضل وأطول مع العملاء.

أخلق علاقة مع العميل

في إحصائية (مش فاكر مصدرها للأسف) كانت بتقول إن أي شخص يعرف على الأقل 3 أشخاص في نفس مجاله أو شغله.

انت ممكن متعرفش توصل للـ Business owners بس هما يعرفوا! لما تشتغل أكتر هتلاحظ أن أغلب شغلك بيكون عبارة عن سيناريو إن واحد من عملاءك الحليين ليه صاحبه -Business Owner برضه- سأله عن حاجة عايز يعملها أو حاجة هو عملها إزاي ومين عملهاله.

أهم حاجة بالنسبالك كفريلانسر هي إن إجابة السؤال اللى انت مش بتسمعه دا يكون اسمك وعلى الرغم ان الموقف بعيد عنك تماماً إلا أنك أكتر حد هيحدد إجابته هتكون إزاي, متخليش أبداً علاقتك مع عملاءك  تبقي شغل وبس حاول تتعرف عليهم أكتر وتعرف هما محتاجين إيه فعلاً, فيدهم في حاجات تانية بعيدة عن شغلك، عيد عليهم في المناسبات، الفكرة وصلتك.

وأهم حاجة إنك تعمل المطلوب منك بشكل يخليك إجابة أي حد بيسأله مين اللى عملك الشغل دا؟ وطبعاً متنساش إنك تاخد آراء العملاء وتضيفها للـ Portfolio بتاعك لأنها مهمة جداً بالنسبالك والمعادلة ببساطة إن التاسك بتجيب تاسك ومشوار الألف عميل بيبدأ بعميل!

طبعاً لحد الآن انا تجاهلت تماماً السؤال الأساسي للموضوع وجاوبت على السؤال اللي انا طرحته لأنه في رأيي أولي وأهم، وإن شاء الله هجاوب على السؤال الأساسي في مقال قريب علشان أقدر أوصل المعلومة كاملة من غير أي نقص.

في رأيك إيه أهم الصفات اللي لازم تكون متوافرة في الفريلانسر علشان يكون أنجح؟

مشاركتك للمقال ممكن تكون سبب في مساعدة غيرك ونشر ثقافة أفضل بين الفريلانسرز ❤