النهاردة كنت بكتب عن أفضل الكورسات اللي سبق وأخدتها علشان ممكن تكون مفيدة لناس أكتر في الفترة الحالية ولكن أثناء دا لاحظت حاجة غريبة، وهي إني وانا برجع لبعض الكورسات دي لقيت إني مسبقش ولا مرة في حياتي إني ضغطت على Get Certificate وإني فعليًا دي أول مرة آخد بالي إنه موجود أصلًا في بعض المنصات.
فا كنت حابب أتكلم حبة عن الشهادات وأشارك رأيي الشخصي اللي عارف إنه ممكن يزعل ناس كتير دا خصوصًا إني بقيت بشوف منافسة شرسة في التايملاين عن مين بينزل شهادات أكتر.
شخصيًا أنا بشوف إن 98% من الشهادات في المجالات العملية ليس لها أي قيمة، هي بقت بس بالنسبة للاماكن اللي بتقدمها ميزة تنافسية لا تقدم أي قيمة تذكر، أما بالنسبة للي بيسعى للحصول عليها فهي مجرد وسيلة signaling علشان تقول أنا أذكى أو أنا أفضل أو أيًا كانت الرسالة اللي بتحاول توصلها منها.
ليه شايف إنها ليس لها أي قيمة؟ لسبب بسيط وهو إن الشهادة لوحدها لا تثبت أي شيء عن قدراتك أو اللي تقدر تقدمه، خليني أصيغها في صورة مسألة رياضية بسيطة: أحمد أخد شهادة من مكان س بتقول إنه خلص مسار تدريبي في مجال ص، إذن مقدار ثقة سوق العمل في قدرات أحمد بتساوي؟ صفر، مقدار ثقة سوق العمل في أحمد وقدراته بتساوي صفر!
ليه لأن بالنسبة لأي حد مهتم بالخدمة اللي بتقدمها أو بالمهارة اللي عندك الشهادات اللي أخدتها كلها لا تعني أي شيء، كل اللي يهمني كعميل محتمل أو حد مهتم بالشغل معاك هو حاجتين:
1. سابقة أعمالك Your Portfolio لأن منها هعرف أنت عملت إيه وبالتالي تقدر تعمل إيه.
2. هل أنت شخص جدير بالثقة وملتزم وأقدر اعتمد عليك أو لأ؟
أي حاجة تاني بتيجي في مرتبة أقل من دول، والشهادة مش بتيجي حتى في مخيلة أي حد مهتم إنه يشتغل معاك.
طبعًا من الجميل إنك يكون معاك شهادات بتفيد أنك خلصت مسارات تعليمية معينة وإن دا بيثبت إنك عندك القدرة على التعلم الذاتي وإنك بتسعى بشكل كبير للتطوير من نفسك وقدراتك، ولكن من وجهة نظر عميلك المحتمل أو صاحب العمل اللي حابب تشتغل معاه دا لا يعني أي شيء عن اللي تقدر تقدمهوله!
حتى الآن أنا بقالي أكتر من 6 سنين بشتغل فريلانسر، كام مرة أتطلب مني شهادة أو كنت في موقف بيتطلب إني يكون معايا شهادة ما؟ ولا مرة! ولو حصل إن عميل طلب حاجة زي كدا بالتأكيد هعتبر دا Red flag ومش هكون مهتم بالتعامل معاه.
ليه انا بقول كل دا؟ لسببين الأول هو إن بسبب أتجاه كتير من الناس لنشر شهاداتها بقى دا واخد اهتمام كتير من اللي لسا بيبدأوا سواء في العمل الحر أو أي مجال تاني، سواء أكان السبب اعتقادهم إنها مهمة أو لمجرد انها Signal في الحالتين كنت حابب الفت النظر لأن دا خاطئ تمامًا وأرجوك متعملش كدا.
السبب التاني والأهم هو إن أغلب مواقع الفريلانس بقت بتطلب منك تاخد شهادات هي بتقدمها، وزي ما قولت قبل كدا هقول تاني إن دي ما هي إلا طريقة ساذجة علشان يكسبوا منك ويخلوا الـ Shareholders مبسوطين وأنت مش محتاج دا في حاجة، ودا مش هيساعدك تكون مقنع أكثر لعميل محتمل ولا حاجة.
طيب في الحالة دي إيه الأهم؟ الأهم هو إنك تركز على إنك تتعلم محتوى الكورس اللي بتاخده وتطبقه بعده مباشرة لأن دا اللي هيساعدك تضيف أعمال أفضل للـ Portfolio الخاص بيك.
وفي النقطة دي أبدي احترامي الكامل لـ SkillShare على إنه فعلًا مش بيقدم أي شهادات وبيقولوا إنك المفروض لما تخلص كورس تطبق اللي اتعلمته في بروجيكت وتضيفه لأن دا اللي هيثبت إنك أتعلمت فعلًا وهيساعدك تكون أفضل مش الشهادة.
وإذا كنت متذكر كويس فـ Brennan Dunn كان أتكلم في إن موضوع الشهادات دي من فترة وكان قال ما هي إلا وسيلة رخيصة من بعض الأماكن علشان تكون ميزة تنافسية ليها في بيع كورساتها لكن هي غير مهمة إطلاقًا على مستوى سوق العمل بس مش فاكر كان قال دا فين بالظبط للأسف.
والأهم كمان هو إنك فعلًا تتعلم محتوى الكورس اللي بتاخده أيًا كان وتبدأ تشتغل على أساسه لو ساعدك تعمل شغلك بشكل أفضل، مش إن تكون أول حاجة تعملها بعد ما تخلص كورس هي إنك تشارك الشهادة على فيسبوك، أشتغل وشارك شغلك دا هيفيدك ويفيد اللي بيشوفه أكتر بمراحل.
حاجة أخيرة في 2016 كنت كاتب بوست بقول فيه:
من وجهة نظري التي لا قيمة ليها على الإطلاق الـ Testimonial أهم من الـ Certificate بعشرة خمستاشر ضعف كدا!
لكن حاليًا نظرتي أتغيرت لأني مش شايف فعليًا أي أهمية تذكر للشهادة، لذلك في الوقت الحالي خليني أقول: رأي عميلك عنك وعن شغلك هو الشهادة الحقيقة اللي المفروض تسعى أنك تاخدها في كل بروجيكت بتشتغل عليه.
