الفترة الأخيرة نسبة القبول في Upwork بقت ضعيفة جداً وخصوصاً لو كنت من مصر أو معظم الدول العربية (بعيداً عن الدول المحظورة تماماً زي سوريا) والأغرب هو نسبة قفل الحسابات اللي زادت بشكل رهيب حتى علي أتفه الأسباب، انا متفهم تماماً إن Upwork بيحاولوا وقدروا فعلاً يكّونوا أفضل وأكبر مجتمع للفريلانسينج في العالم لكن على الجانب الآخر نجاحهم في كدا خلاهم بيتعاملوا بقيود وطريقة صعبة أكتر من اللازم، المقال دا فيه تجربة حقيقية هتعرف منها إزاي متضيعش وقتك وفلوسك ومجهودك في يوم وليلة خصوصاً لو هتشتغل علي Upwork.
السؤال الأهم ليه حسابه اتفقل؟
دا بياخدنا لبداية القصة وهي إن محمود كان عنده حساب قديم على Upwork عمل عليه بروجيكت واحد، بس كانت المشكلة وزي ما واضح في رسالة Upwork ليه في الصورة
وهنا محمود عمل حساب جديد على الموقع بنفس بيانات حسابه القديم والعميل طلب منه ينتظر علشان البروجيكت هيتأخر كام شهر، هنا بقي محمود اشتغل على مشاريع تانية وفعلاً خلص 3 مشاريع بنسبة نجاح 100% ورجع كمل شغل مع العميل القديم وعملا تاني أكتر من الأول، وقرر أنه يوجه كل تركيزه على Upwork ويطور من مهاراته أكتر علشان يقدر يشتغل علي مشاريع أكتر وفعلاً اشتغل علي 15 مشروع بتقييمات معظمها 5 Stars ونسبة نجاح وصلت لـ94% وحقق أكتر من 8000$ أرباح وكمان أخد بادج Top-Rated في الموقع وبقي واحد من الأفضل في مجاله وكل دا في سنة واحدة من الحساب الجديد.
لحد هنا بقي من تقريباً شهر طلبوا منه تحقيق شخصية كأجراء روتيني، ومحمود بعتلهم تحقيق الشخصية وكان نفس اللي عمل بيه الحساب القديم، وبعتلهم مسج طويلة بيشرح فيها القصة دي كلها وليه هو عمل الحساب الجديد علشان كان قلقان إن الحساب دا كمان يتقفل، ودا كله واضح في الصور دي
الرد على المستوي الشخصي كان صادم بالنسبالى من Boaz واللي قاله إنه مش صح يكون عنده أكتر من حساب على الموقع وإن دا مخال لقواعد الاستخدام ومش صح، وقاله إنه هيحّول الحالة للقسم المختص وهما هيشوفوا الموضوع.
وجه الرد من Mary G أغرب من اللي قبله واللي بتقول فيه:
انا بكلمك لأننا لاحظنا إن حسابك متصل بحسابات تاني على الموقع (تقصد الحساب القديم) وإن بنود الخدمة بتسمح بمستخدم واحد فقط لكل حساب، وحساب واحد لكل مستخدم. وإن وجود أكتر من حساب لمستخدم واحد (“حسابات متعددة”) أو أكتر من مستخدم في حساب واحد مش حاجة بيشجع عليها Upwork، وكمان دا ممكن يكون مربك بالنسبة للعملاء على الموقع. في الوقت الحالي، حسابك وأي حسابات تانية مرتبطة بيه هيبقوا في الانتظار. وإن خيار إعادة تنشيط حسابك مبقاش متاح وممكن منردش على أي طلب تاني في الموضوع دا
اللي كان واضح بالنسبالى لما شوفت الطلب دا وردهم عليه كان حاجة واحدة بس، إنهم مش بيتعاملوا مع مشاكل عملائهم بشكل H2H لأن مش منطقي إنهم من الرسالة دي كلها مياخدوش بالهم غير من نقطة إنه كان عنده حساب قديم خصوصاً إنه هو اللي قالهم كدا مش هما اللي لاحظوا أصلاً بجانب أنه وضح أكتر من سبب منطقي وإيجابي ليه هو عمل حساب جديد، لكن مكنش في أي مراعاة للأسف!
المهم إنه كان من الواضح علشان المشكلة دي تتحل يكون في تواصل مباشر معاهم بعيداً عن الـ Requests والـ emails لأن كلها بيترد عليها بطريقة غريبة ومش مقبولة بصراحة، تاني يوم بعد ما جمعت ورتبت الأحداث كلها، وبعد الاتفاق مع محمود قررت أكلمهم بنفسي علشان أوضح الموضوع بشكل أفضل وفعلاً اتصلت بالـ Customer Support وكلمني حد إسمه Jani فضلنا نتكلم لمدة 35 دقيقة
وشرحتله الموقف بالظبط وبعتله رقم الطلب وهو بنفسه راجع القصة كلها، الغريب إنه طول المكاملة كان بيكرر نفسه الجملة
“أنا من خدمة العملا ومش من القسم المختص ومقدرش أساعدك أو أوعدك بأي حاجة”
ولما كنت برد عليه بأنه إيه البوينت من كلامنا لو مش هيقدر يساعدني وليه مفيش تواصل مباشر مع قسم الـTrust & Safety كان بيقولي هبعتلهم الكلام دا كله علشان يعيدوا النظر في حالتك بعيداً عن كدا هو كان متعاون ومتفهم جداً الحقيقة، بعد تقريباً 24 دقيقة من الكلام والشرح والإقناع قال: “اسمحلي أسألك سؤال” قولتله: “أتفضل أكيد” فقالي: “انا لو كان عندي حساب وأتقفل فدا معناه أني مش فريلانسر كويس صح؟” وكان ردي ببساطة:
أتفق معاك، بس ليه لازم يكون دا السيناريو الوحيد؟ متفترضش وجود سيناريو معاكس بعيداً عن إن حد من الموقع طلب مني أشتغل معاه كمان، وهو إني كنت لسا في بدايتي وخبرتي مش قوية وبعد ما أتطورت أكتر وأخدت شهادات أكتر (وكنا بعتنا الشهادات كلها والإثباتات بالكلام دا) وبقي مستوايا أفضل عملت حساب تاني والدليل على كدا واضح وهو إني في سنة قدرت أحقق أكتر من 8000$ وكمان بقيت Top-rated
هنا بقي معرفش يرد وقالي فعلاً كلامك صح والوقتي انا فهمت الموضوع بشكل أفضل وهبعتلهم الكلام دا كله.
وفعلاً زي ما واضح في الصورة إن Jani كتر خيره فهم الكلام دا كله وبعتهولهم في صيغة مختصرة وضح فيها الموقف بشكل أفضل. ودي كانت إضافة محمود وفيها الشهادات وحالة الحساب حالياً
وجه الرد من Angel أغرب من كل الردود اللي سبقته واللي باختصار بتقول فيه إننا شركة خاصة ولينا الحق في تقرير مين اللي يقدر يشتغل على منصتنا وإحنا قررنا عدم مشاركتك، وإن القرار دا نهائي وغير قابل لطرح أي استئناف عليه وبنطلب منك بذوق إنك متكلمناش تاني!
شخصياً انا اتعاملت مع الـ Customer Support الخاصة بمعظم الشركات اللي ممكن تكون تعرفها أو متعرفهاش وبعمل دا بشكل شبه يومي، وأقدر أقول عن ثقة إن خدمة العملا الخاصة بـUpwork واحدة من أسوأ 3 أتعاملت معاهم دا إذا مكانتش الأسوأ، بداية من الـskim reading للطلبات والرد عليها بشكل يخليك صعب تحدد اللي بيرد عليك دا شخص زيك ولا Autoresponder مروراً بصعوبة الوصول للدعم الفني في مكالمة (كلمتهم 4 مرات علشان أقدر أوصل لمكالمة مع حد) وصولاً للقرارات اللي فيها نوع من التسلط واللي واضح في التجربة كلها إن أنت كفريلانسر مش مهم بالنسبالنا!
الغريب إنه أثناء كل الأحداث دي عميل كان خلص معاه شغل وعمله تقييم 5 Stars!
خلاصة القصة كلها في نصايح سريعة
أو خلينا نقول الدروس المستفادة من القصة دي ببساطة
خلاصة القصة كلها في نصايح سريعة
أو خلينا نقول الدروس المستفادة من القصة دي ببساطة
1. قبل ما تبدأ تشتغل على أي موقع إتأكد إنك قريت كل حاجة خاصة بشروط الاستخدام وقواعد الموقع للتعامل والأهم تلتزم بيها علشان تتجنب تماماً أي مشاكل ممكن تأثر عليك مستقبلاً.
2. من الحاجات اللي دايماً بنصح بيها وهي إنك متحطش البيض كله في سلة واحدة علشان متبكيش على اللبن المسكوب! يعني ببساطة متخليش كل اعتمادك على موقع واحد بس أو مكان واحد بس بتشتغل فيه، مهم تنوع مصادر دخلك وشغلك مش بس علشان متخسرش كل حاجة لو لا قدر الله حصلت أي مشكلة في الموقع أو مشكلة ليك أنت في الموقع، لأ لأنه ببساطة انت متعرفش الخير فين فا أشتغل في أكتر من مكان بس خلي النسبة الأكبر من تركيزك في المكان اللي نجحت فيه أكتر.
3. من الوضح تماماً في التجربة كلها إنك تتجنب تعمل أكتر من حساب بنفس البيانات علشان كل المواقع والشركات مش بتحب دا وبتعتبره تضليل للمستخدمين وإساءة استخدام للخدمة.
4. الدرس الأهم وهو إنك متبدأش شغل وأنت في مرحلة التعلم أو لو لسا مش واثق من جودة شغلك، ممكن تشتغل بشكل محلي (وانا شخصياً بفضل دا) لكن إتأكد تماماً إن الشغل في مواقع زي Upwork بيكون ليه متطلبات عالية وصعب لو لسا بتبدأ فا خد وقتك كله بس المهم تبدأ صح ولما تكون مستعد.
5. طور نفسك باستمرار ولو حتى 10 دقايق في اليوم وبعد سنة هتتفاجئ بالمستوي اللي وصلتله وهتحقق حاجة كبيرة إن شاء الله.
وأخيراً مشاركتك للمقال ممكن تساعد كتير من الفريلانسرز يتعلموا من التجربة ويعرفوا أن مع الشغل المستمر والتطوير هيقدروا يحققوا أكتر من اللي ممكن يتخيلوه والأهم أنهم ياخدوا بالهم من الوقوع في نفس الأخطاء.
27 تعليق. Leave new
اولا حسبنا الله ونعم الوكيل
ثانيا ان شاء الله ربنا هيوفقه وهيعوضه عشان هو شخص مجتهد في مجاله وربنا مش بيضيع تعب حد
ثالثا ..يعني ايه اشتغل محلي ؟؟
ازاي؟
النقطة رقم 4
إن شاء الله ربنا هيوفقه أكيد لأنه شخص مجتهد وشغله مميز وأنا واثق أنه هيقدر ينجح في أي مكان وأي وقت.
تشتغل محلي يعني مع عملاء محليين في بلدك أو برا بلدك بعيداً عن المواقع وبشكل، بالنسبة لنقطة رقم 4 ننصحك تقرأ مقال إزاي تتعلم أي حاجة في أقل من شهر
طيب انا حصل معايا نفس المشكلة السيناريو مختلف هل مفيش اى حل اني ارجع اشتغل تاني علي upwork ؟
للأسف يا مصطفي بنسبة كبيرة لأ، كنا نتمني تشوف المقال دا قبل المشكلة الحقيقة.
ازيك يا علي عامل ايه يا رب تكون بخير،
سؤالي: هل لو كان مسح الأكونت الأول بمجرد ما عمل التاني كان هيتفادى حصول الليلة دي كلها في المستقبل؟
حاجة كمان: أنا شايف إنه غلط إنه اصر يرجع يتعامل مع العميل من خلال الموقع، العميل جاي يقلك نتعامل برة ف دي حاجة كويسة ليك وليه (إلا لو خايف من حفظ حقه) ف ايه رأيك انت؟
أهلًا بيك يا عمر، الحمد لله انا بأفضل حال وأتمنى تكون بحال أفضل وأسلم يارب.
بالنسبة لسؤالك يا عمر فهو فعلياً مكنش عنده القدرة على كدا على ما أتذكر لأنه أتوقف.
فعليًا وجهة نظرك تحترم جدًا يا عمر ودا اللي شخصيًا كنت هعمله خصوصًا لكونه عميل متكرر مش جديد، ولكن هو كان ليه رأي مختلف.
انا حسابي اتعلق بسبب البروفايل مش قوي وعدلته وزي ماهو الحساب متعلق ايه الحل
للأسف يا منى دي مشكلة العمل على Upwork الحل هو إنك تحدثي الحساب زي إنك تضيفي شهادات جديدة حصلتي عليها مؤخرًا، مهارات جديدة وخدمات أو أي حاجة تساعد في تقوية حسابك.
نعلش هو سؤال بره الموضوع شويه بس زي ما حضرتك قلت لازم نفهم قبل ما نشتغل انا للاسف في مشكله دلوق و بتمني حل ليها انا كل ال connects بتوعي علي upwork خلصو و مش هقدر اشتري هل كده خلاص مش هعرف اشتغل علي الموقع تاني ؟؟
بالتأكيد لأ يا إسراء، الـ Connects بيتم تجديدها شهريًا، في الحالة دي إنتي بتنتظري الشهر الجاي.
ازيك يا عمر
بالصدفة فتحت المدونة دى تانى و فتحت الصفحة دى اللى بتتكلم عنى
بالنسبة لأول حاجة ما ينفعش حد على اب ورك يمسح الاكونت بتاعه و هوا معموله Suspend لأن هما بيعملو block للشخص من للاكونت.
بالنسبة لتانى نقطة ف انتا عندك حق فعلا انا كنت غلطت انى رجعت اشتغل عليه تانى و جايز اكون غلطان انى اشتغلت عليه من الاول اساسا.
بس وقتها الواحد مكنش عنده الخبرة الكافية انه يسوق لنفسه و يجيب عملا كويسين غير ع الموقع فكنت متخيل ان دى فرصة تانية اعمل بروفايل كويس عليه و اجيب منه عملا تانيين (ودا حصل فعلا).
بس عموما لو رجعت للنقطة دى تانى اكيد ما كنتش هعمل كدا و كنت هتعامل معاه برا الموقع (زى ما عملت بعدها و كلمت الناس اللى كانو اشتغلو معايا ع الموقع اننا نكمل شغل برا لان الحساب اتقفل و غالبيتهم وافقو و لسه بنتعامل لحد انهاردة بدون مشاكل)
بردو حابب اضيف انى اكتشفت لما بطلت شغل ع الموقع ان العملا اللى عليه مش احسن نوعية الواحد ممكن يتعامل معاه (ممكن مثلا 90% منهم مش بيدفعو كويس) مع ان من زمان كنت متخيل العكس بس من تجربتى معاهم و تجارب ناس تانية كتير انتا ممكن تجيب عملا كويسة بتدفع كويس برا منصات الفريلانسنج عموما لأن في نسبة كبيرة من الكلاينتس بيتعاملو مع الفريلانسرز ع المواقع انهم بيقدمو خدمات بمقابل ارخص و دا فعلا بيحصل من ناس كتير بتعمل كدا زى بعض الهنود و بعض المصريين للاسف و دا بيخلى المنافسة اصعب جدا.
فالموضوع بالنسبالى دلوقتى لما الاكونت اتقفل مكانش بالسوء اللى كنت متخيلة وقتها و بعد حوالى 4 سنين بقيت متأكد ان قفل الاكونت كان شئ كويس جدا حصلى عليا لأنه كان comfort zone بالنسبالى و كنت غلطان فعلا انى كنت حاطط البيض كله فى سلة واحدة زى ما على بيقول بس التجارب بتعلم.
طيب في مواقع ايه تانيه ممكن تجيب شغل فريلانسر من عليها غير upwork
لا حول ولا قوة الا بالله
السلام عليكم اخوك من موريتانيا
انا اعلمت حساب على اب ورك لكن ما قبلوه اظن بسبب البروفايل هل يمكن تعديله أقصد أن أضع شهادات وخبرات مو عندي عشان يقبلوه
السؤال الثاني يعني مثلا حد دخل على اب وورك كي يتعامل مع مترجم ليش ما ايروح على القاموس وايترجم لنفسه بدون ما يدفع افلوس
ارجو الإجابة وشكرا
وعليكم السلام ورحمة الله وبركاته أخي وأهلًا بكل وبكل أخواننا في موريتانيا ❤ بداية أسمحلي أعتذرلك على التأخير في الرد طول الفترة دي.
بالنسبة لسؤالك عن عدم القبول على أب ورك دا أصبح شيء طبيعي في الوقت احالي، بالتأكيد أنصحك جدًا بإضافة خدمات مختلفة وشهاداتك وأي تغير يطرأ على حياتك المهنية وإن شاء الله هيتم قبوله.
أما بالنسبة لسؤالك الثاني، دا بيكون ليه اسباب كتير زي أنه الترجمة هي مهارة معقدة أكتر بكتير من البحث في القاموس، وإن العملية دي بتاخد وقت طويل وبالنسبة لأغلب أصحاب الأعمال مش بيكون عندهم الوقت دا وبالتالي الأستعانة بمترجم متخصص بتكون منطقية أكتر.
أتمنى أكون جاوبت على اسئلتك ولو عندك أي أستئلة أو استفسارات تانية هكون سعيد بالإجابة عنها في أي وقت.
حصل معايا نفس الموضوع بالمليي.
أنا حزين لتجربتك يا أحمد وكنت أتمنى لو المقال كان ساعدك قبل ما تتعرض لنفس التجربة.
حصل معايا فى موقع فريلانسر … انا عامل كل حاجة ورابط بيبال وبطاقة الائتمان وكله
وتقييم 5 نجوم
جه انهرده تم قفل حسابي
الى حصل اني جيت افتح اشوف الرسايل من تطبيق الفون زي كل عادة
فتحت التطبيق قعد شوية عشان يخش
المهم فتح جابلي رسالة معناها يعني اقفل التطبيق وافتح تاني
عملت كدا جابلي رسالة وقالي حسابك اتقفل
لحد الوقتي معرفش ايه السبب
فيه حاجة نسيت اقولها .. انا بطلت فريلانسر الشهر ده عشان امتحانات
يعني بقالي شهر مش بفتح
واظن ان من حقي او براحتي اقفل وافتح وقت ما انا عايز والفكرة اني مفيش اي تعاقد ف اي بروجيكت بروجيكتاتي مخلصها
هل ده ممكن تكون رسالة من ربنا ان رزقي ممكن يكون فى موقع تاني احسن واستخدام الموقع يكون اخف واحسن واسهل
أنا حرزين لتجربتك يا مصطفى ولكن ممكن يكون خطأ فني أو ماشابه أنصحك تتواصل مع الدعم الفني وإن شاء الله مشكلتك تتحل.
في الحقيقة معرفش إن منصة فريلانسر بتطبق سياسة لغلق الحسابات الغير نشطة في المقابل بيتم تحويلها لوضع الأجازة، وفي منصة أب ورك عدم حصولك على مشاريع بيقلل الـ Job Sucess Rate (JSS) لكن مفيش أي تأثير على الحساب.
هو في مطلق الأحوال مينفعش تحط البيض كله في نفس السلة ويفضل تشتغل على أكتر من موقع ولكن لازم تعرف السبب ممكن تكون مشكلة بسيطة وتتحل إن شاء الله.
انا حصل معايا الموضوع لكن فري لانسر ..كان عندي حساب من حالي 5 شهور ركنته فتره بعدين رجعت استخدمه تاني قعد معايا حوالي شهر تقريبا بعدين اتقفل وكل م اعمل حساب بعد كدا يتقفل مش فاهمه السبب ف اي ولا المشكله فين ليه كل حساب اعمله يتقفل وهل مفيش حل اعمل بيه حساب جديد …. كمان كل م اجي افعل identity verify يتقفل ؟؟؟؟؟؟؟!!!
للأسف يا آلاء دا طبيعي لأن من سياسة إستخدام منصات زي أبورك وفريلانسر هي إن مينفعش يكون لشخص واحد أكتر من حساب على المنصة، وبالتالي الحسابات الجديدة ليكي هتتقفل علشان حسابك الرئيسي إتقفل، أنصحك تتواصلي معاهم بخصوص مشكلة حسابك الرئيسي.
ممكن اعرف ايه الحاجات التانية اللي بتخلي الابوورك يقفل الحساب؟ مثلا كان في عميل اخد رقم تليفوني من السي في وبعتلي على الواتساب بس مشتغلناش.. هل بسبب دة هيقفلو الحساب؟ انا اعرف ان الدفع برة الموقع بس هو اللي مينفعش.. وكمان كنت عايزة اعرف لو في عميل طلب مني اني اكلم جهة معينة على التليفون واديلهم شغل وانا استلمه واديهوله مع العلم ان هو بيدفعلى على ابوورك هل دة كمان ضد سياسة الموقع؟ وهل الابوورك ممكن تاخد بالها من الرسايل بتاعتي انا والعميل ويقفلوا على ااساس اني ببعتله سكرين شوت بالدفع وهو بيدفعلى على اساسه على ابوورك؟
صباح الخير استاذ علي انا جديد علي اب ورك هل في ايداع بعمله في الاول
السلام عليكم أنا من السودان ماعندي خبرة ولا رأس مال وأريد أن أسوق للخدمة تصميم الفيديو على أن أتفق مع شخص مصمم من باكستان أو الهند أن يصمم لي بسعر أرخص من سعر السوق وأن أسلمه بعد أستلم قيمة الخدمة من العميل وأنا أعرضها في منصة تانية بسعر السوق عشان أربح الفرق بينهم هل آب وورك يوفر هذه الخدمة وإذا كيف يمكنني أن أسجل فيها وكيف يمكنني أن أتفق مع شخص يصمم لي بسعر أرخص من سعر السوق وأن أسلمه بعد أستلم قيمة الخدمة من العميل وكيف ممكن أعرضها في منصة تانية وأنا ماعندي مهارات ولا خبرة وأكون شاكر جزيلا
السلام عليكم اخي الكريم الله يعطيك العافية يارب
سؤال انا من سوريا ومدير مشاريع برمجة وعندي فريق برمجي قوي ولله الحمد ورايد افتح حساب على upwork اجيب منه عملاء لكن بتعرف انه سوريا محظور ال upwork فيه هل اذا اشتريت كاسر من صديق بالخارج وفعلت بايبال عاى حساب صديقي ايضا ممكن يتم العمل على upwork من خلال الكاسر
الله يعطيك العافية
طيب انا المفروض خلصت مشروع على المنصه بتاعتهم و بكلم العميل مش بيرد عليا و هو قايلي ان الدفع في خلال اسبوعين و حالا عدى 18 يوم على معاد تسليم المشروع و مش عارف اكلم مين هل حضرتك عندك حل ؟