إزاي -وليه- تتعلم أي حاجة في أقل من شهر؟ الجزء الأول

سألت نفسك قبل كدا إحنا ليه كعرب عموماً ومصريين خصوصاً مش ناجحين عموماً مش كأفراد؟ لو السؤال دا مخطرش في بالك إنك تدورله على إجابة فا في الحقيقة انا كان شاغلني جداً لفترة من الوقت وخلاصة التفكير فيه لقيت إن السبب الأكبر -من وجهة نظري طبعاً- هو إننا بندور على إجابة سؤال “إزاي؟” مش “ليه؟”

إزاي Vs ليه!

حاول تفكر كدا في الشغل في مصر عموماً هتلاقي أي حد حابب يتعلم حاجة بيسأل “إزاي أعمل كذا؟” “عملت دا إزاي؟” وكتير من الأسئلة اللى مسبوقة أو متبوعة بـ “إزاي” ويمكن بشكل كبير اكتسبنا الثقافة دي للأسف من نظامنا التعليمي اللى هيعلمك إزاي بس عمرك ما هتعرف ليه! لما حد بيشتغل جديد في مكان كلهم هينقلوله معرفتهم للإزاي دي، نادراً جداً ما تلاقي حد بيسأل بـ “ليه”؟ يعني مثلاً في مجال شغلي كمصمم بشوف كتير من الأسئلة زي مثلاً “إزاي تصمم لوجو بالـ Golden ratio؟”

في حين إن السؤال المفروض يكون ليه استخدمت الـ Golden Ratio؟ إيه الهدف من استخدامها؟ وليه انا محتاج أتعلم استخدمها أصلاً؟ وبطبيعة الحال لما تعرف ليه، إجابة سؤال إزاي دا هتبقى بديهية جداً وبالعكس هتفهم بشكل أكبر وممكن تطور إزاي خاصة بيك انت أصلاً! 

عشان بس مطّولش في الكلام في النقطة دي وننسي موضوعنا الأساسي، هتلاقي كم أكبر من المعلومات في كتاب Start with Why للعبقري Simon Sinek أو لو مش بتفضل القراءة دا Talk ليه بيتكلم عن نظريته الذهبية.

نرجع بقى لموضوعنا، أغلب الأسئلة اللى وصلتني متعلقة بالموضوع دا كانت عبارة عن سيناريو حد حابب يتعلم أي مجال بيحقق دخل كويس أو عايز يشتغل مثلاً أياً كانت الأسباب، الحقيقة رأيي الشخصي في الموضوع دا ممكن يكون قاسي شوية بس -للأسف- هو مبني على واقع بنشوفه كل يوم، العموم الأكبر من الشباب بتدور على الشغل قبل ما بتدور على التعلم والمعرفة (انا بتكلم على التعلم مش الدراسة) يعني بيكون مثلاً خبرته في مجال ما لا تتعدي 10% او خلينا متفائلين شوية ونقول 20% وبيبقى عايز يشتغل الوقتي.

استثمر في نفسك تكسب أكتر!

نصيحتي ليك هي إنك متدورش على الشغل خالص في المرحلة دي، لو وجهت تركيزك كله على التعلم والمعرفة في المجال اللى هتختاره مع حبة صبر صدقني الشغل هو اللي هيجري وراك مش العكس! انا مدرك تماماً ان لكل حد ظروفه وأسبابه الخاصة, وجهة نظري ببساطة شديدة هي إن الصبر والتعلم هيضاعفوا أرباحك يعني مثلاً لو أنت عايز تشتغل النهاردة وأنت عندك خبرة بسيطة, طبيعي هيكون المقابل قليل على قدر خبرتك خلينا نقول 1000جـ مثلاً, بعملية حسابية بسيطة أنت كدا بعد سنة هتحقق   12الف جنيه.
طيب تخيل مثلاً لو أنت قضيت 3-6 شهور في التعلم وكّونت خبرة أكبر ساعتها بطبيعة الحال قيمتك هتبقى أعلي خلينا نقول على أقل تقدير 2000جـ في الشهر, بنفس العملية الحسابية البسيطة أنت كدا هتحقق في سنة 24 الف جنيه (الأرقام كمثال مش أكتر).

كل اللى أنت قدمته في المقابل كان وقت ومجهود -وفلوس في بعض الأحيان- لمدة 6 شهور مثلاً، أي حد عنده خبرة ولو بسيطة في البيزنيس هيشوف إن دا ديل مربح فوق جداً! ودا نستنتج منه إن أكبر استثمار هيحققلك عائد أفضل على المدي البعيد هو استثمارك في نفسك.

خلينا نفترض إنك اقتنعت بالكلام دا وخلاص قررت تركز في التعلم بس المرحلة دي، في الحالة دي دا هيقودنا لسؤال مهم وهو…

 إيه أنواع التعليم؟

 عشان تتعلم قدامك خيارين:
1- إنك تتعلم عن طريق الممارسة والتجربة بنفسك.
2- إنك تتعلم عن طريق غيرك، زي اكتساب خبرات من الكتب أو التعلم من تجارب الآخرين.

1.  التعلم بالممارسة والتجربة

دا كان النوع اللى استخدمته في تعلم التصميم لفترة طويلة وبقولك في النهاية إن لو معايا آلة زمن كنت هرجع بيها وأمنع نفسي من إني أعمل كدا!

طبعاً الموضوع في حالتي كان عفوي وبدافع فضول التعلم الجميل وإحنا صغيرين فا كنت بعمله من غير وعي تقريباً وكنت بقضي وقت طويل جداً في إنى أعمل دا من أجل المتعة وممكن مكنش عندي وقتها تصور كبير أن دا ممكن يكون مصدر رزقي مستقبلاً مثلاً، فا كنت بقضي وقت كبير جداً أستكشف الفوتوشوب وأجرب حاجات جديدة وبعدها أستنتج هي وظيفتها إيه وأقدر أستخدمها علشان أعمل إيه (كان عندي 12 سنة وقتها) وتقريباً قضيت 5 سنين مثلاً مشوفتش 6 دروس للفوتوشوب أو حتى قريت كتاب واحد أو حتى مقال بسيط بيتكلم عن التصميم!

طبعاً الكلام دا على الرغم أنه ظاهرياً يبان وحش جداً وغلط إلا إن دا ميمنعش برضه إن التجربة دي أفادتني كتير وسهلت عليا كتير بعد كدا بس تخيل لو كان حصل العكس كانت النتايج ممكن تبقى عاملة إزاي، يعني لو انا كنت بدأت باللي بعمله من 5 سنين وهو إني أقرا كل شهر كتاب عن المجال دا وأشوف شغل أكتر واستلهم وأحاول أطور ستايل يكون خاص بيا أكيد النتايج كانت هتتضاعف وأسرع بكتير ودا بالظبط الغلط اللى مش عايزك تقع فيه زيي.

2. التعلم من تجارب الآخرين

النوع التاني بقى هو الأصح من وجهة نظري، وهو حاجة بيعملها الأشخاص الأذكياء بالمناسبة، طبعاً انا لما بقول إنك تتعلم عن طريق غيرك مقصدش الأسئلة المباشرة عن كل حاجة مثلاً، أقصد المتابعة والملاحظة والاستنتاج بس من غير ما تخوض أنت التجارب بنفسك دي حاجة هتعلمك حاجات كتير جداً من غير ما تكلف نفسك أي حاجة تقريباً، على سبيل المثال انا في ناس في حياتي على الرغم إني متعلمتش منهم أي حاجة بشكل مباشر إلا إني بعتبرهم أكتر الناس أتعلمت منها في حياتي!

التعلم من تجارب الآخرين ليه صور وأشكال مختلفة يمكن أهمها الكتب، الكورسات، الفيديوهات التعليمية، المقالات، او حتى الأشخاص. في مجال الشغل بقى الموضوع يختلف شوية وليه قاعدة بسيطة هي “Get yourself a mentor” “دور لنفسك على معلم” أو بالبلدي يعني “اللى ملوش كبير يشتريله كبير”.

هنا بقى أنت عرفت كل اللى محتاج تعرفه او ببساطة اتعلمت التعلم نفسه، قبل ما تبدأ فعلياً تتعلم في 4 خطوات محتاج تاخدهم: 

4 خطوات تاخدهم قبل ما تبدأ تتعلم مجال ما

الخطوة الأولي: حدد هدفك صح من قبل حتى ما تبدأ.

كتير من الشباب بياخدوا وقت كبير يتعلموا حاجة وبعدها يكتشفوا إنها مش مناسبة ليهم أو مش دي الحاجة اللى فعلاً حابينها، الحقيقة إن دي كارثة! طبعاً في البداية بس دا مش وقت ضايع ولا حاجة لأن أي وقت بتتعلم فيه هو مكسب ليك بس أنت كدا هتغلط نفس غلطتي اللي فوق بس بشكل أكثر ضرر لأنك مش هتستغل المعرفة دي بنسبة كبيرة.

 لو أنت معندكش أي خبرة في مجال ما خليك فاكر كويس إن كل الناس اللى نجحت فيه فعلاً بدأوا من نفس النقطة دي بالظبط، علشان تعرف إيه المجال اللى فعلاً لو بدأت فيه هتبقى حاجة كبيرة في المستقبل إسأل نفسك سؤال واحد “إيه الحاجة اللى بحبها وممكن أشتغلها طول حياتي وانا بحبها؟” لو لقيت إجابة للسؤال دا يبقى هو دا المجال اللى تبدأ تتعلمه. اما لو ملقتش إجابة يبقى أسأل نفسك سؤال كمان “إيه الحاجة اللى انا فعلاً مميز فيها وبعملها أحسن من أي حد غيري؟” لو لقيت يبقى دا المجال أنت سابق فيه فعلاً، لو ملقتش إجابة يبقى لازم تجرب نفسك في أكتر من حاجة لحد ما تلاقي الحاجة اللى هتحبها أو هتكون مميز فيها لأن دي الحاجة اللى هتنجح فيها.

 نصيحة إياك إياك إياك تشتغل حاجة أنت مش بتحبها لأنك هتضيع حياتك من غير ما تحقق أي حاجة بيها ومش هتتقدم في شغلك خطوة حتى، لإنك مش هيكون عندك الدافع اللى يحركك ويجبرك إنك تتعلم وتطور نفسك طول الوقت، وطبعاً الغلط اللى ممكن تكون عملته فوق ساعدك في إنك تلاقي إجابة للسؤال اللى ممكن يغير حياتك كلها بس بشكل غير مباشر.

الخطوة التانية: اتعلم إنجليزي.

لما حد بيقولي إنه عايز يتعلم حاجة ما يعمل إيه؟ برد عليه رد تلقائي هو اللى برده كل مرة على نفس السؤال وهو ببساطة “اتعلم إنجلش” من وجهة نظري لو اتعلمت إنجليزي فا أنت كدا اتعلمت 50% من أياً كان إيه المجال اللي بتفكر أو عايز تتعلمه، طيب ليه؟

لأسباب كتير أول واهم حاجة هي إن أياً كان المجال اللى هتشتغله سواء تصميم أو برمجة أو أياً كان، فا البرامج اللى هتستخدمها والحاجات اللى هتشتغل بيها كلها وحتى مصادر التعلم نفسها مكتوبة أصلاً إنجلش (وبالمناسبة دا السبب انهم بيكونوا أحسن مننا هما مش عباقرة ولا حاجة بس مكتوب بلغتهم).

وأغلب الحاجات دي هتبقى بديهية تماماً لما تكون عارف إنجليزي كويس، تاني سبب انا بعتمد في تعليمي كله على محتويات أجنبية وبقيت مش بتحمل أصلاً أنى أقري محتوي عربي في مجال ما لأن بنسبة 95% المحتوي بيكون عبارة عن حد قرأ المحتوي الأجنبي وفهم منه 80% وترجمه فا ضاع منه 20% في الترجمة وهو في الأخير قدر يوصل 60% بس من المعلومة دا كمان لو وصلها كاملة زي ما اتعلمها بالظبط واللي غالباً مش بيحصل، مش بنتقد حد بس للأسف النسبة الأكبر من المحتوي التعليمي العربي بيكون كدا، قليل جداً ما تلاقي مصدر عربي فعلاً تقدر تعتمد عليه في تعلم أي حاجة، علشان كدا لازم تتعلم بنفسك من المصدر دا اللي هيخليك دايماً سابق بخطوتين عن أي حد تاني.

الخطوة التالتة: خليك منظم وابعد التشتت عن حياتك.

لما تلاقي إجابة سؤال من الأتنين اللي فوق وتحدد المجال اللى فعلاً قررت أنه يكون هو مستقبلك المهني، هنا بقى لازم تعمل توقف كلي لأي أفكار تاني أو شغل في حياتك وتخلي المجال دا بس في بؤرة تركيزك، اللي يعرفني أكيد عارف إن التشتت من أكتر الحاجات اللى كانت مبوظة عليا حياتي حرفياً ومانعاني من إني أوصل لحاجة انا عارف تماماً إن امكانياتي أعلي منها بكتير.

على سبيل المثال انا فعلياً كنت بشتغل 7 حاجات مختلفة واللي يعرفني عارف قد إيه انا كويس في اللى انا بعمله بس المحصلة النهائية إنى “كويس” في اللى انا بعمله و “كويس” دا مش طموحي إطلاقاً تخيل بقى لو الوقت اللى كنت بعمل فيه الـ 7 حاجات دول كان كله مخصص لحاجة واحدة بس! أكيد كنت هوصل فيها أبعد بكتير من إني أمشي في 7 طرق مختلفة ودا اللى أنصحك تماماً تبعد عنه (هتكلم عن إزاي تتخلص من التشتت في مقال منفصل لأن الموضوع طويل حبتين).

الخلاصة هنا لو أتعلمت بشكل عشوائي وشتت نفسك في أكتر من مجال مش هتتعلم كويس ولا هتتطور بسرعة مهم جداً تتخصص علشان تتعلم اللى هيفيدك وتقدر تبقى في مستوي أحسن في أقل وقت.

الخطوة الرابعة: نوع مصادر تعليمك.

وانت بتتعلم أي حاجة في غلطة ممكن تقع فيها وهي إنك تعتمد على مصدر واحد بشكل أساسي في تعلمك لمجال ما، بعيداً عن إن دا مش هيعلمك 100% من اللى المفروض تتعلمه هو كمان هيكون سبب في إنك تبقى في النهاية نسخة أقل بشوية من المصدر اللى بتتعلم منه وهتطلع نفس النتايج ويمكن بمستوي أقل.

اللى المفروض تعمله هو إنك تنوع مصادر المعرفة بتاعتك وتخليها من أكتر من مصدر سواء كورس أو معلومة جديدة أو مقال لو دورت هتلاقي حد تاني شارحها بطريقة مختلفة أو ضايف عليها معلومة أكبر أو رابطها بمعلومة تانية أو ستايل تاني خالص، متعتمدش على يوتيوب مثلاً بنسبة 100% واقرا كتب أو مقالات وشوف كورسات أونلاين حتى لو كلهم بيتكلموا عن نفس الموضوع لأن دا هيساعدك تكسب خبرة أكبر واللي بدوره هيساعدك إنك تطور ستايل خاص بيك هيميزك عن كل المصادر دي مش هتبقى كوبي بيست من حاجة أو حد تاني.

بعد كل الكلام دا أعتقد انت الوقتي كونت فكرة كويسة عن التعليم بشكل عام ومتحمس تعرف إزاي تتعلم، هنا بقى هضطر أقولك إن مفيش قاعدة ثابتة للموضوع دا لأنه شخصي تماماً وانت لازم تعرف بنفسك إيه أكتر أسلوب بتفضله في التعلم انا دوري هينحصر بس في أني أعرض عليك الطرق دي وأقولك نبذة بسيطة عن كل حاجة وتجربتي معاها لعلها تكون مفيدة.

الخلاصة

طبعاً انت تعبت من القراءة وأكيد لاحظت أنى لسا متكلمتش أصلاً عن “إزاي” ولا أي خطوات عملية أو مصادر ومقارنة بينها مثلاً او حاجة فعلاً كخطوات تنفيذية والمقال كان فيه كتير من إخفاقاتي الشخصية، دا مقصود تماماً لأن الحاجات دي مهم جداً تعرفها قبل ما تبدأ تاخد أي خطوة عشان متكررش نفس الأخطاء وتضيع وقت كبير تعالجها فا خليت المقال مزيج بين “ليه” مع حاجات مهم تعرفها قبل ما تبتدي أصلاً لأنه إنك تعرف الغلط أفضل بكتير من إنك تعرف الصح خصوصاً في المرحلة دي.

المقال الجاي هيكون تكملة للمقال دا وهيكون عن الجانب المشرق شوية وهتتعلم فيه فعلاً إزاي تتعلم من وأنت 0 خبرة لحد ما توصل للمستوى اللي بتتمناه إن شاء الله 

المعلومات والتجارب اللى في المقال دا انا كنت أتمنى أعرفها قبل ما أبدأ فعلاً أشتغل ومتأكد إنها مفيدة لأي حد في المرحلة دي، مشاركتك للمقال ممكن يكون سبب في إننا نشوف حد ناجح جداً مستقبلاً نستلهم منه كلنا.

لو كنت قرأت المقال فا يهمني أعرف إيه الغلط اللي كنت بتقع فيه وكنت تتمني تكون عارف الصح من البداية؟