الصراع مع الروتين! إزاي تحقق روتين يومي إيجابي

لو أنت فريلانسر -وأتوقع إنك كدا- فا بالتأكيد أنت أخترت دا عشان تهرب من شبح الروتين، عايز كم أكبر من الحرية عشان تقدر تبدع في اللي أنت بتعمله، كل دا جميل بس لو فكرت في حياتك من غير روتين للحظات هتلاقيها تحولت لحياة عشوائية غير محددة وكلها تشتت وتسويف!

متستغربش، أنا شخصياً لفترة طويلة في حياتي كنت بقاوم الروتين بكل قوتي، معرفش دا بسبب الحياة الروتينية المملة اللي بشوفها لبعض الناس في حياتي ولا بسبب كم الشعارات اللي بنقراها كل يوم عن “كسر الروتين” و”التخلص من الروتين” وغيرهم كتير.

هو إيه الروتين؟

في البداية قبل ما نتكلم في الموضوع خّلونا الأول نتفق على تعريف الروتين لأن دا اللي هنبني عليه باقي الكلام، الروتين وفقاً لمعني الكلمة نفسها “سلسلة من الأحداث بيتم إتباعها وتكرارها”، الجملة في حد ذاتها لو هتشوفها بشكل ظاهري هتلاحظ إنها حاجة سلبية وغير مفيدة إطلاقاً وخالية من أدني مظاهر الحياة.

وهتلاحظ دا بصورة أكبر في حياة نسبة كبيرة من الموظفين بشكل عام وإن الروتين اليومي ليهم شبه ثابت ومش بيتغير، زي إنهم بيصحوا الصبح في نفس التوقيت كل يوم بيعملوا نفس الحاجات اللي بيعملوها قبل ما يروحوا الشغل من نفس الطريق وبنفس الوسيلة، والوضع في الشغل فعلياً مش بيختلف عن برا الشغل غالباً بيعملوا نفس المهمة بشكل تكراري كل يوم وبيرجعوا يمارسوا نفس الأنشطة سواء كانت فرجة على التلفزيون أو غيرها ويناموا في نفس التوقيت بدقة متناهية عشان يصحوا برضه يكرروا نفس العملية.

أنت أكيد بتفكر حالياً في إنك كفريلانسر أخترت تبقي مختلف وتبعد الروتين تماماً عن حياتك والمثال اللي فوق غالباً أكدلك وجهة نظرك وأقنعك بيها بشكل أكبر وبقيت أكثر تحمس للفكرة.

الحقيقة انا كنت كدا في السنين الأولي، شايف إن الروتين هو تاني أكبر أعدائي -بعد التشتت طبعاً- وبحاربه طول الوقت وشبه عايش في صراع معاه أو بهرب منه، لكن بعد حبة تفكير اكتشفت ببساطة إني بالتأكد كنت غلط أو بمعني أدق المدخلات الغلط اللي كونتها عن فكرة “الروتين” خلتني أفكر فيه بشكل سلبي تماماً وبالتالي حكمي عليه كان من نفس المنطلق.

مش قصدي تماماً أقول إن الروتين حاجة جميلة وغالباً بنظلمها بسبب المعني الحرفي للكلمة، هو بالتأكيد ليه سلبياته واللي بيتم تداولها والكلام عنها بصورة كبيرة، لكن كمان ليه إيجابيات -وللأسف- نادراً ما بيتم ذكرها أو قليل جداً من الناس بتشوفه من المنظور دا، ودا اللي هحاول أوصله في باقي المقال.

إمتي تعرف إنك عايش روتين سلبي أو إيجابي؟

بعد الكلام دا مهم تعرف تحدد إمتي حياتك تحولت لروتين سلبي وإمتي الروتين دا يكون إيجابي. هقولك على 5 علامات رئيسية لو لقيتها في حياتك اعرف إنك بتعيش روتين سلبي:

1.  أول وأوضح علامة هتلاحظها للروتين السلبي هو إن نمط حياتك بيفرضه عليك وأنت مش بتشارك في تحديده إطلاقاً أو بنسبة محدودة جداً، لكن بتستسلم ليه وبتتبعه بدون حتى التفكير في إيه اللي أنت بتعمله.
2.  لو لاحظت إنك بتعيش فترات طويلة من الشعور بالملل والفراغ ومش عارف أو مفكرتش تحدد هدفك من الحياة ودورك فيها وإن دا مبقاش فارق معاك من الأساس.
3.  لو مبقاش عندك شعور بالتطور أو التقدم او حتى الشعور بالإنجاز وتحقيق شيء ما مهما كان بسيط.
4.  فقدانك للاهتمام بالحياة بشكل عام وإنك غير مبالي بالأحداث حواليك مهما كان تأثيرها على حياتك، أو بعبارة أخري “كله رايح”.
5.  لو لاحظت -وغالباً مش هتلاحظ- إنك مش بتمارس أي أنشطة جديدة أو بتفكر حتى في تغيير حاجة في حياتك وبتقنع نفسك إنك راضي بدا وإن دي قناعة وإنه مفيش داعي.

الخمس علامات دي انا متأكد إن كلنا مرينا بعلي الأقل واحدة منهم في حياتنا، لو لاحظت حاجة منهم في حياتك أو إنك مش المتحكم في مسار حياتك بشكل عام، ساعتها بالتأكيد هتشوف الروتين حاجة سلبية وهتحاول -لو كان عندك الرغبة فعلاً- تتخلص منه.

إزاي تتخلص من الروتين السلبي؟

خليني قبل ما أتكلم عن إيجابيات الروتين أقدملك 5 نصايح هتساعدك تتخلص من الروتين السلبي في حالة لو كنت بتمر بواحدة أو أكتر من العلامات اللي فوق (لو لأ تقدر تتخطي قراءة الجزء دا)

1. جرب حاجات جديدة
بنسبة كبيرة الروتين بيكون سببه التقيد بالمعروف والالتزام بيه، ممكن تكسره بسهولة لو جربت تعمل حاجات جديدة في حياتك أنت مش متعود عليها، زي إنك تمشي من طريق مختلف مثلاً أو تطلب حاجة جديدة في المنيو اللي كل مرة بتقراها كلها وترجع تطلب نفس الأكلة اللي متعود عليها، لحد حتى إنك تجرب مجالات جديدة عن شغلك لو وقتك يسمح أو على الأقل تعرف أكتر عنها!

2. غير من أجل التغيير
تغييرات بسيطة جداً لو دخلتها على حياتك بدفعات صغيرة متقاربة هتلاحظ إنك مبقتش مقيد إطلاقاً بأي روتين! شخصياً في حاجات كتير كنت بقول مستحيل هعملها زي إني أجرب نوع معين من اللبس أو الأكل واتفاجئت لما عملتها إنها أفضل من اللي كنت متخيله ودا أداني فرصة أكبر أغير حاجات كتير في حياتي لمجرد التغيير بدون انتظار نتيجة أو حاجة.

جرب غير طريقة لبسك حاجة بسيطة في شكلك أو أوضتك أو شخصيتك أو حياتك بشكل عام ومع الوقت هتكتشف أكتر إنك كنت مقيد بروتين سلبي ملوش داعي وهتتخلص منه بسهولة جداً.

3. خصص وقت للتفكير
حاول تخصص وقت في يومك لمجرد التفكير في مسار حياتك ككل ونشاطاتك اليومية وإيه منها المفيد وإيه الغير مفيد وإيه أهدافك، تقدر تعرف أكتر عن الفكرة في مقال إزاي تخرج من سجن وضعك الحالي.

4. حدد أهداف وأرسم خطط
أحد أهم أسباب الروتين السلبي زي ما ذكرت فوق هو عدم وجود أهداف واضحة في حياتك بتشتغل عشان تحققها، بالتالي تحديد الأهداف وتذكير نفسك بيها في حد ذاته هيساعدك تتخلص من الروتين السلبي بنسبة كبيرة، وطبعاً الأهداف من غير خطط لكيفية تنفيذها هتبقي ببساطة مجرد أحلام، عشان كدا مينفعش يكون عندك أهداف من غير خطط، ودا هتكلم عنه مستقبلاً إن شاء الله.

5. ركز على سعادتك
أهم حاجة بيسلبها منك الروتين السلبي من غير ما تاخد بالك هي الأحساس بالسعادة! لو ركزت في المثال اللي ذكرته في بداية كلامي أكيد أنت نفسك حسيت بملل ورتابة لمجرد قراءته، ما بالك بقي إنك تعشيه! أكيد دي حاجة هتأثر عليك بالسلب جداً خصوصاً من الناحية النفسية وهتفقد تماماً الأحساس بالسعادة.
لو فكرت تخلي تركيزك بنسبة ما منصب على سعادتك الشخصية وإنك تعمل الحاجات اللي هتخليك مبسوط مهما كانت بسيطة من وقت للتاني دا لوحده كافي جداً إنه يخلصك من الروتين والشعور بالملل.

صراع التشتت

بالنسبة للعلامات اللي فوق، انا شخصياً مريت بيهم في حياتي ويمكن دا كان الهدف الأساسي من إني أدخل في صراع مع الروتين وأحاول أمنعه طول الوقت، لكن مع مرور الوقت اكتشفت إن دا كان خيار غلط من البداية! صراع الروتين في حد ذاته ترتب عليه عدم استقرار في نمط حياتي بشكل عام ودخلني في صراع أكبر مع حاجة أبشع وهي التشتت!

وقتها لما فكرت أكتر لقيت إني فعلياً كنت بمارس روتين يومي في بعض الأنشطة ودا كان مفيد جداً وإني أتأثرت بالسلب تماماً لما توقفت عنها، زي مثلاً إنه كان من عاداتي اليومية إني أمارس رياضة، وإني أتعلم على الأقل 10 -وأحياناً صفحة- كلمات إنجليزية جديدة من القاموس.

 دي فعلياً كانت أنشطة روتينية في حياتي وكنت بمارسها كل يوم وكان تأثيرها إيجابي جداً على حياتي بشكل عام ومأدركتش دا غير لما توقفت عنها لفترة نوعاً ما طويلة، بالتالي ظهر في دماغي سؤال جديد “هو الروتين حاجة سلبية فعلاً زي ما هو معروف عنه!؟”

ومع فترة من البحث والتفكير اكتشفت إن الروتين ممكن يكون حاجة إيجابية وفعّالة جداً سواء في تحسين قدراتك الشخصية أو حتى زيادة إنتاجيتك، طيب السؤال الأهم…

إزاي تضيف روتين إيجابي لحياتك؟

أول حاجة لو رجعت للعلامات اللي اتكلمت عنها عن الروتين السلبي وعكستها أنت كدا وصلت لإنك تحقق روتين إيجابي بكل بساطة، بس عشان أسهلها عليك أكتر هقولك 3 حاجات لازم تاخد بالك منها عشان تتأكد إنك بتمارس روتين إيجابي

1.  الروتين اليومي ليك لازم تكون أنت اللي محدده بنفسك مش مفروض عليك بأي وسيلة كانت، أنت اللي تحدد أمتي تشتغل وإمتي تتعلم وإمتي تتفرج على فيلم أو تخرج مع أصحابك وتعمل أي حاجة أنت عايزها (بافتراض إنك فريلانسر وعندك رفاهية الاختيار).
2.  الروتين اليومي الإيجابي في رأيي الشخصي لازم يكون متنوع وبيركز على أولوياتك الشخصية بمعني الحاجات المهمة أولاً والأقل أهمية بتيجي بعدها، وبيحقق توازن مابين الجوانب المختلفة لحياتك خلينا نقول بشكل أساسي شغلك وتطويرك لمستواك وفيه جانب لا بأس به من الاستمتاع والراحة.
3.  حاجة كمان مهم تاخد بالك منها هي إنه يكون مرن وقابل للتبديل في أي وقت علي حسب اختلاف أولوياتك وحاجاتك الأساسية ومتطلبات المرحلة اللي أنت فيها، إبعد عن الصرامة في تنفيذ الروتين اليومي حتى لو كان إيجابي وإياك تفرضه على نفسك.أنت حدده والتزم بيه بس مش مشكلة إنك تفقد التوازن في مرحلة ما منه طالما هتحافظ على الاستمرارية فيه، أهم حاجة متبقاش صارم مع نفسك وتجبر نفسك على تنفيذه لأن دا هيحوله لروتين سلبي أو الأسوأ هيخليك تكرهه وتتجنبه تماماً!

الروتين الإيجابي بطبيعة الحال بينعكس على حياتك بالإيجابية، وهتلاحظ دا في جوانب مختلفة من حياتك فا لو لقيت إن الأنشطة اللي بتمارسها بشكل يومي في حياتك وتحولت من عادات لروتين يومي مش محققة النتيجة دي يبقي أرجع خصص وقت للتفكير وحلل الموقف وهتقدر بسهولة تحدد المشكلة وساعتها هتقدر تتعامل معاها بشكل أفضل.

روتيني اليومي الشخصي

مش هخفي عليك سراً أنا شخصياً بمارس روتين يومي محدده بنفسي وهو ببساطة إني بصحي من النوم بغسل أسناني وبعمل مشروب وبخلص كل الحاجات الصغيرة من إيميلات وبحث وردود علي الرسايل وببدأ بشتغل لحد العصر تقريباً.

 بعد العصر حاجة أساسية عندي وهي إني أتابع Class جديد علي Skillshare أو كورس عندي بمعدل ساعة بعتبرها بريك من الشغل، بعدها برجع أشتغل كمان أو أدور علي حاجة كنت عايز أعرفها لو كان في، بعد المغرب لحد العشا دا وقت مخصص للتمارين الرياضية (وصدقني دي أهم حاجة لازم تضيفها ليومك لأنها هي اللي هتظبط كل حاجة تانية)

أما بعد العشا أول حاجة غالباً بعملها هي إني بتفرج علي Ted Talk جديد ولو كنت مصمم أنصحك تتابع Art and Design Playlist  حاجة منتهي المتعة وبتجمع بين المعرفة والمتعة في نشاط واحد، بعدها برجع أكمل شغل وغالباً علي حاجات شخصية زي المدونة مثلاً، بعدها بفترة غالباً بتفرج علي فيلم أو بتابع حلقة جديدة من مسلسل وبقرأ بمعدل نص ساعة لساعة وبنام.

دا الروتين اليومي الخاص بيا وعامله بطريقة تجمع بين الشغل والتعلم والمتعة بشكل متوازن والغريب أني بقيت بزعل لو كسرته في يوم ما أو بدلت نشاط إيجابي زي القراءة بنشاط أقل أهمية!

 وحقيقي أقدر أقولك بكل ثقة إن دي حاجة مفيدة من نواحي كتير، زي مثلاً إني مبقتش محتاج أعمل تخطيط يومي لليوم وبكتفي بالتخطيط الأسبوعي وترتيب المهام اللي عندي لأني بطبيعة الحال عارف انا المفروض أعمل إيه وبقيت بعمله بشكل تلقائي سريع وبالتأكيد أسهل.

 ناهيك عن إن دا مش بيتيحلي وقت أصلاً للتسويف أو تأجيل المهام والنقطة الأهم من وجهة نظري هي إن صداقتي مع الروتين خلصتني من شبح التشتت واللي كان مبوظ عليا حياتي حرفياً، خلاصة التجربة دي كلها إني أوصلك رسالة بسيطة مفادها إنك عشان تتغلب على الروتين مش الصح إنك تحاربه، جرب تكون صداقة معاه وتستغله في إنه يكون حاجة إيجابية في حياتك وهتتفاجئ بالنتيجة!

لو كنت قريت كل دا، انا بالتأكيد مهتم أعرف وجهة نظرك الشخصية عن الروتين؟ وهل علاقتك بيه إيجابية أو سلبية؟

مشاركتك للمقال ممكن تغير حياة حد للأفضل